کاروار:8؍اگست(ایس اؤ نیوز)اترکنڑا ضلع  میں سیلاب اور طغیانی سےپیدا شدہ حالات قابو میں ہیں، ضلعی انتظامیہ اپنے پورے عملے کے ساتھ عوام کا تعاون کررہی ہے، ضلع کے تمام ڈیم محفوظ ہیں، کسی بھی ڈیم میں خطرہ سے اوپر پانی کی ذخیرہ اندوزی نہیں کی گئی ہے۔ سیلاب کے حالات کی نگرانی اور تعاون کے لئے  ضلع سپرنٹنڈنٹ آف پولس اور ضلع پنچایت سی ای اؤ افسران کی ٹیمیں متاثرہ مقامات پر موجود  ہیں، حالات سے عوام نہ گھبرائیں ، خاص کر کسی بھی طرح کی افواہوں پر دھیان نہ دیں۔ یہ بات اترکنڑا ضلع کے ڈپٹی کمشنر ڈاکٹر ہریش کمار نے کہی ۔ وہ  کدرا سرکٹ ہاؤس میں اخباری نمائندوں کے ذریعے ضلعی عوام کو حالات کے متعلق جانکاری دے رہے تھے۔

ڈی سی نے بتایا کہ کوڈسلی ڈیم میں دراڑ  پیدا ہونے کی خبر غلط ہے، وہ صرف ایک افواہ ہے، ضلع انتظامیہ کی طرف سے ہرطرح کے  پیشگی حفاظتی اقدامات کئے گئےہیں، افواہوں پر بالکل توجہ نہ دیں البتہ خطرہ محسوس ہوتی ہی  بلندی والی  جگہوں پر یا بازآبادکاری مراکز میں جاسکتے ہیں۔    ڈی سی نے بتایا کہ ضلع نگراں کار سکریٹری مونیش مڈگل نے ضلع کا دورہ کرتے ہوئے سیلاب سےمتاثرہ علاقوں کا معائنہ کیا ہے ، اسی کے ساتھ انہوں نے  بازآباد کاری مراکز کابھی جائزہ لیا ہے۔ اس کے علاوہ سرکاری نمائندے کی حیثیت سے پورے ضلع کی نگرانی کررہے ہیں، لہٰذا عوام کو خوف زدہ ہونےکی ضرورت نہیں ہے۔

انہوں نے بتایا کہ بھٹکل ہوناور کے حالات پورے کنڑول میں ہیں۔ اگر آج بارش کم ہوتی ہےتو کل جمعہ کو سیلاب ختم ہونے کا امکان ہے، انکولہ اور کمٹہ میں بارش کم ہونے پر حالات کو معمول پر لوٹنے کے لئے دو دن لگیں گے، مزید کہا کہ  متعلقہ علاقوں کے اسسٹنٹ کمشنرس کی قیادت میں تحفظاتی اور بازآبادکاری کاکام جاری ہے۔

انہوں نے کہا کہ منڈگوڈ میں زیادہ بارش ہورہی ہے، پڑوسی اضلاع میں بھی بارش زائد  ہونےکی وجہ سے بھاری مقدار میں پانی بہہ کر ضلع میں  آنے سے عام زندگی مفلوج ہوئی ہے، حالات کو دیکھتے ہوئے وہاں 2-3بازآبادکاری مراکز شروع کئے گئےہیں، بقیہ سرسی اور یلاپور میں حالات قابو میں ہیں۔ ضلعی سطح کے افسران  کو باز آبادکاری مراکز کی ذمہ داری دینے کے ساتھ ساتھ انہیں مراکز میں عوام کے ساتھ صبر سے کام لینے کی ہدایت بھی  جاری کی گئی ہے۔ اس موقع پر ضلع کے ایس پی ونایک پاٹل ، ضلع پنچایت سی ای اؤ محمدر وشن موجود تھے۔