لکھنؤ، 12/ستمبر (ایس او نیوز /ایجنسی) اتر پردیش پاور کارپوریشن لمیٹڈ (یو پی سی ایل) کی طرف سے  بجلی چوروں کے خلاف مسلسل چھاپہ ماری کی کارروائی ج ہورہی ہے  اور اس مہم میں  صرف اگست  ماہ میں ہی 371 بجلی چوروں کو پکڑا گیا ہے، جو مختلف طریقوں سے بجلی کی چوری کر رہے تھے۔ ان تمام افراد پر بجلی کارپوریشن نے مجموعی طور پر 57 لاکھ روپے کا جرمانہ عائد کیا ہے، جو کہ کارپوریشن کی عزم و ارادے کو ظاہر کرتا ہے۔

بجلی کارپوریشن کے افسران کا کہنا ہے کہ چھاپہ ماری کی یہ کارروائی بوقت صبح کی جا رہی ہے۔ زیادہ چوری والے علاقوں میں ترجیحی بنیاد پر کارروائی کی جا رہی ہے۔ جو بھی بجلی چوری کرتے ہوئے پایا جا رہا ہے اس پر مقدمہ درج کر جرمانہ عائد کیا جا رہا ہے۔ غور کرنے والی بات یہ ہے کہ اس طرح بجلی چوری سے بجلی لائن میں خرابی پیدا ہوتی ہے، ساتھ ہی اوور لوڈنگ کا مسئلہ بھی پیدا ہو جاتا ہے۔ جس سے دوسرے لوگوں کو پریشانی کا سامنا کرنا پڑتا ہے۔ کئی علاقوں میں بجلی چوری کی وجہ سے پیدا خرابیوں کے سبب بجلی گل ہونے کا مسئلہ بھی پیش آتا ہے۔

میڈیا رپورٹس کے مطابق بھوپورا واقع ڈیفنس کالونی، کرشنا وِہار کُٹی، پنچ شیل کالونی اور آکسی ہوم سوسائٹی کی 8 گھنٹے بجلی گل رہی۔ اس سے یہاں کے 50 ہزار سے زیادہ لوگوں کو پریشانی کا سامنا کرنا پڑا۔ بوقت صبح لوگوں کو پانی تک نصیب نہیں ہو سکا۔ مقامی لوگوں کا کہنا ہے کہ رات تقریباً 2 بجے بجلی کٹ گئی تھی۔ صبح تک بھی بجلی معمول کے مطابق نہیں رہی۔ بجلی گھر پر شکایت کرنے سے لوگوں کو بتایا جا رہا ہے کہ 33 ہزار کی لائن میں خرابی ہے۔ اس کے بعد جب لوگوں نے افسران کو فون کیا تو انھوں نے بھی یہی بتایا کہ خرابی کو ٹھیک کیا جا رہا ہے۔ صبح تقریباً 10 بجے بجلی کی فراہمی معمول کے مطابق ہونی شروع ہوئی۔