یوگی کا ایک اور متنازعہ بیان۔ ‘ ایس پی‘ بی ایس پی او رکانگریس کے لئے علی ‘تو ہمارے ساتھ ہیں بجرنگ بلی
میرٹھ،10؍اپریل (ایس او نیوز؍ایجنسی) آئے دن بی جے پی لیڈران اپنے متنازعہ بیانات سے ملک میں نفرت پھیلانے کاکام کررہے ہیں مگر الیکشن کمیشن خاموش تماشائی بنا ہوا ہے۔ قبل ازیں یوپی کے چیف منسٹر یوگی ادتیہ ناتھ نے ہندوستانی فوج کو ’’مودی سینا‘‘ کہا تھا جس پر الیکشن کمیشن نے ایک انتباہ دے کر خاموش ہوگیا تھا مگر اس مرتبہ یوگی ادتیہ ناتھ نے جو کہا وہ ان کی ذہنیت کی عکاسی کرتا ہے۔
واضح رہے کہ سماج وادی پارٹی کی صدر مایاوتی نے دیو بند میں ایک انتخابی جلسہ عام سے خطاب کرتے ہوئے کہاتھا کہ’’ مسلمان کسی بھی قیمت پر اپنے ووٹ تقسیم ہونے نہ دیں‘ اور اپنے ووٹوں کا استعمال عظیم اتحاد میں شامل بہوجن سماج پارٹی‘ سماج وادی پارٹی اورراشٹریہ لوک دل کے امیدواروں کے حق میں کریں‘‘۔
جس کے جواب میں چیف منسٹر یوگی ادتیہ ناتھ نے کہاکہ ’’ ایس پی‘ بی ایس پی‘ آر ایل ڈی کے لئے علی ہیں تو ہمیں بجرنگ بلی پر بھروسہ ہے‘‘۔ ایسا پہلی مرتبہ نہیں ہوا کہ یوگی ادتیہ ناتھ نے اس طرح کا بیان دیا ہے۔ سال2015کے اسمبلی الیکشن میں بھی یوگی ادتیہ ناتھ نے اترپردیش کے مختلف اسمبلی حلقوں میں مہم کے دوران اسی طر ح کے بیانات دئے تھے ۔
ادتیہ ناتھ کے علاوہ وزیراعظم نریند رمودی جس کو بی جے پی اپنا سپہ سالا رمانتی ہے وہ بھی اسمبلی الیکشن میں’ عید کے لئے لائٹ تو دیوالی کے لئے کیوں نہیں‘کے علاوہ ’قبرستان کے لئے زمین تو شمشان کے لئے زمین کیو ں نہیں‘ جیسے بیانات دے کر ماحول میں نفرت پھیلانے کی کوشش کرچکے ہیں۔
ملک کے عوام الیکشن کمیشن پر زور دے رہے ہیں کہ وہ اس طرح کی بیان بازیو ں پر سختی کے ساتھ کاروائی کرے بالخصوص ایسے وقت میں جب ملک کے عوام دنیا کی سب سے بڑی جمہوریت کی باگ ڈور کسی کے ہاتھ میں سونپنے کی تیاری کررہی ہے۔
