بریلی،15؍اپریل (ایس او نیوز؍ایجنسی) ملک بھر میں کورونا وائرس کی وجہ سے لاک ڈاؤن جاری ہے، لیکن یوگی راج میں پابندیوں کے درمیان بھی جرائم پیشہ بے لگام ہیں۔ معاملہ بریلی کا ہے جہاں بی جے پی لیڈر یونس احمد ڈمپی کا منگل کی دیر رات چار حملہ آوروں نے گولی مار کر قتل کر دیا۔ بی جے پی لیڈر کو گولیوں سے چھلنی کر دیا گیا جس کی وجہ سے موقع پر ہی اس کی موت ہو گئی۔ حملہ آور جائے وقوع سے بہ آسانی فرار ہو گئے۔ مہلوک بریلی میں بی جے پی اقلیتی سیل کے نائب صدر تھے۔
یونس احمد کے اہل خانہ کے مطابق زمین تنازعہ کی وجہ سے ڈمپی، سراج الدین، عصام الدین اور آصف کے ساتھ بند تھا۔ ان کے خلاف دو سال پہلے بارہ دری پولس اسٹیشن میں معاملہ درج کیا گیا تھا۔ یونس کے ایک رشتہ دار کا کہنا ہے کہ "یہ تینوں ایک شخص کے ساتھ آئے اور ڈمپی کو گولیوں سے چھلنی کر دیا۔ اس سے پہلے کہ کوئی کچھ سمجھ پاتا چاروں بھاگ گئے۔ انھوں نے یہ یقینی کر لیا تھا کہ ان کے باہر نکلنے سے پہلے ڈمپی مر جائے۔"
اس واقعہ کی اطلاع ملتے ہی سینئر پولس سپرنٹنڈنٹ شیلیش کمار پانڈے موقع پر پہنچے۔ ضلع کے سبھی راستے سیل کر دیئے گئے ہیں۔ پولس نے بھی جرائم پیشوں کے ممکنہ ٹھکانوں پر چھاپہ ماری شروع کر دی ہے۔ لاش کو پوسٹ مارٹم کے لیے بھیج دیا گیا ہے اور ایس ایس پی نے کہا ہے کہ ملزمین کو جلد ہی گرفتار کر لیا جائے گا۔