ساحلی علاقوں میں مزید تین دنوں تک برسات کی پیشنگوئی۔ بے موسم کی بارش سے محکمہ الیکٹری سٹی کو ہوالاکھوں روپے کا نقصان
بھٹکل 8؍جنوری (ایس او نیوز)محکمہ موسمیا ت کی طرف سے جاری کیے گئے بیان کے مطابق ریاست کرناٹکا کے ساحلی علاقوں سمیت ملناڈ، بنگلورو ،کولار،میسور اور کئی دوسرےمقامات پر بے موسم کی برسات کا سلسلہ مزید تین دن تک جاری رہ سکتا ہے۔
انڈین میٹیرولوجیکل ڈپارٹمنٹ (آئی ایم ڈی) کے ڈائریکٹر سی ایس پاٹل نے بتایا کہ :’’مغرب میں بحیرۂ عرب اور مشرق میں خلیج بنگال کے اندرپیدا ہونے والی طوفانی ہواؤں اور کم دباؤ کی وجہ سے آئندہ تین دنوں کے دوران جنوبی ریاست کے بہت سارے اضلاع میں معتدل سے تیز برسات ہوسکتی ہے۔‘‘
محکمہ موسمیات کی پیش گوئی کے مطابق ملناڈاور ساحلی علاقے میں بڑے پیمانے پر برسات ہوگی جبکہ اندرونی کرناٹکا میں کہیں کم اور کہیں معتدل برسات ہوگی۔اس بنیاد پر جنوبی کینرا ، اڈپی ،شمالی کینرا ، چکمگلورو، ہاسن کوڈاگو اور شیموگہ یا ملناڈ علاقے کے لئے ایلّو الرٹ جاری کردیا گیا ہے۔
اڈپی میں میسکام کو نقصان: اڈپی سے ملی خبروں کے مطابق ضلع میں بھاری بارش اوربجلیاں گرنے سے میسکام (مینگلور الیکٹری سٹی ) کو 18.76لاکھ روپے کا نقصان پہنچا ہے۔ سب سے زیادہ نقصان کنداپور تعلقہ میں بجلی سربراہی کا ساز وسامان تباہ ہونے کی وجہ سے بھگتنا پڑاہے۔بتایا گیا ہے کہ یہاں کل 20کھمبے ٹوٹ گئے ہیں، 12ٹرانسفارمرس تباہ ہوئے ہیں اور کافی لمبی کیبل لائن بے کار ہوگئی ہے۔اس سے ہونے والے نقصان کا اندازہ 10.80روپے لگایا گیا ہے۔
بجلی گرنے سے ہوٹل میں لگی آگ: منگلورو اور اڈپی کے بہت سارےعلاقوں میں تیز برسات کے ساتھ بجلی گرنے کے واقعات بھی پیش آئے ہیں جس سے کافی نقصانات ہونے کی خبر ہے۔ برہماور کے آکاش وانی سرکل کے پاس واقع ایک ہوٹل پر بجلی گرنے سے شارٹ سرکیوٹ ہوگیا جس کی وجہ سے آگ لگ گئی اور ہوٹل بری طرح جل گیا ہے ۔پولیس اور فائر بریگیڈ عملے نے موقع پر پہنچ کرآگ پر قابو پالیا۔ اس آگ سے ہونے والے نقصان کا تخمینہ ایک لاکھ روپے سے زائد لگایا گیا ہے۔
بجلی گرنے سے گھروں کو نقصان: اڈپی اور منگلورو کےکئی مقامات پر بجلی گرنے سے مکانات اور دوسری عمارتوں کو نقصان پہنچے کی بھی خبریں مل رہی ہیں ۔ بیندور تعلقہ کے اپوندا میں بجلی گرنے سے ایک گھر کو جوجزوی نقصان پہنچا ہے اس کا اند ازہ 50000ہزار روپے اور کارکلا تعلقہ میں ایک گھر کو نقصان پہنچا ہے اس کا اندازہ 80000روپے لگایا گیا ہے۔