کورونا اَپ ڈیٹ: جنوبی کینرا اور اڈپی میں تھم نہیں رہا ہے کووِڈ کا قہر۔ تازہ معاملات میں حاملہ خواتین اور بچے بھی شامل
منگلورو،14؍جون (ایس او نیوز) جنوبی کینرا میں سنیچر کے دن کووِڈ۔19کے 30نئے معاملات سامنے آئے جس کے بعد وہاں پر جملہ متاثرین کی تعدا د 271 ہوگئی۔جبکہ اڈپی ضلع میں 14نئے پوزیٹیو کیس نکلے جس کے ساتھ متاثرین کی جملہ تعداد1,005ہوگئی ہے۔
جنوبی کینرا میں سنیچرکے دن جن30 افراد کی رپورٹ پوزیٹیو آئی ہے ان میں 19مرد،11خواتین اور 10بچے شامل ہیں۔گیارہ سے میں سے 6خواتین حاملہ ہیں۔تازہ پوزیٹیو کیس والے25افراد سعودی عربیہ اور بقیہ پانچ افراد مہاراشٹرا سے واپس لوٹے ہوئے ہیں۔اس کے علاوہ سنیچر کے روزصحت یاب ہونے والے 17افراد کووینلاک اسپتال سے ڈسچارج کیا گیا۔ان میں 14مرد،3خواتین شامل ہیں۔ اس طرح اسپتالوں سے ڈسچارج ہونے والے کُل افراد کی تعداد 146ہوگئی۔یہاں پر تاحال پوزیٹیو نکلنے والے 271افراد میں 10افراد دوسرے اضلاع سے لوٹے ہوئے ہیں۔فی الحال جملہ 118مریض ایکٹیو انفیکشن کا شکار ہیں۔ 13جون کے دن جملہ 28مریضوں کو سانس کی شدید تکلیف کے ساتھ اسپتال میں داخل کیا گیا ہے، جبکہ 29افراد کو نگرانی کے لئے اسپتال میں لایا گیا ہے۔
اسی طرح اڈپی ضلع میں پوزیٹیو نکلنے والے 14مریضوں میں 8مرداور 6خواتین ہیں، جس میں ایک بچہ بھی شامل ہے۔یہ تمام مریض مہاراشٹرا سے واپس لوٹے ہوئے ہیں۔466افراد ہوم کوارنٹین میں رکھے گئے ہیں جبکہ 4ہائی رِسک مریضوں کو اسپتال میں کوارنٹین کیا گیا ہے۔سنیچر کے داخل کیے گئے 11افراد سمتی فی الحال اڈپی ضلع میں 75 افراد آبزرویشن وارڈ میں داخل ہیں۔ان میں سے ایک کورونا کا مشتبہ مریض ہے۔7مریض سانس کی شدید تکلیف کا شکار ہیں اوربقیہ مریضوں کو انفلوئنزا جیسی شکایات ہیں۔ کل سنیچر کے دن جملہ 139افراد کواسپتال سے ڈسچارج کیا گیا ہے۔اڈپی ضلع میں فی الحال 284 ایکٹیو معاملے موجود ہیں۔
