بھٹکل 19/ستمبر (ایس او نیوز) اُترکنڑا ضلع پنچایت چیف ایکزی کوٹیو آفسر(سی ای او)  محمد روشن کے حکم پر عمل درآمد کرتے ہوئے بھٹکل تحصیلدارکی قیادت میں ریوینیو ڈپارٹمنٹ کے افسران نے جمعرات کو دکانداروں کی مخالفت کے باوجود مرڈیشور کے سڑک کنارے بنی ہوئی غیر قانونی دکانوں کو ہٹانے کی کارروائی انجام دی۔

سی ای او نے ریوینیو ڈپارٹمنٹ کو حکم دیاتھا کہ ریوینیو محکمے کی ملکیت والی زمین سروے نمبر 396aکے کچھ حصے پر بنی ہوئی جھونپڑی نما غیر قانونی دکانیں ہٹادی جائیں۔دکانداروں کی مخالفت کی وجہ سے تھوڑی دیر کے لئے ماحول کشیدہ ہوگیا مگر ریوینیو محکمے کے افسران نے کارروائی انجام دینے کے لئے پولیس کا بندوبست کرلیاتھا۔دکانداروں کا موقف یہ تھا کہ 1981سے سرکاری محکمے کو جرمانہ بھرنے کے بعد یہاں چھوٹا موٹا کاروبار کرکے اپنی زندگی گزاررہے ہیں۔اس لئے ہمیں سرکاری طورپر اس کی متبادل جگہ فراہم کی جائے گی تو ہم خود ہی یہاں سے جگہ خالی کردیں گے۔25سے30سالوں سے یہاں پر دکانیں قائم ہیں۔ سڑک کی توسیع کے لئے جتنی جگہ  درکار ہوگی وہ ہم چھوڑنے کے لئے تیار ہیں۔

 اس موقع پر تحصیلدار وی پی کوٹرلّی نے دکانداروں کو بتایا  کہ یہ زمین ریونینو محکمے کی ملکیت ہے۔ سڑک کی توسیع کرنے کے لئے اس کے کنارے پر بنی ہوئی دکانیں ہٹائی جارہی ہیں۔ضلع پنچایت سی ای او اور بھٹکل اسسٹنٹ کمشنرکے درمیان ہونے والی میٹنگ میں عدالت کے فیصلے کے مطابق اس سرکاری جگہ کو غیر قانونی قبضے سے خالی کروانے کا فیصلہ کیا گیا ہے۔اور یہ کام بتدریج کیا جائے گا۔