مینگلور20؍اپریل (ایس او نیوز) قریبی علاقہ موڈبیدری کے مضافاتی علاقے میں ایک اگربتی کی وجہ سے لگنے والی آگ سے چھوٹا ساگھر پوری طرح جل کر خاکستر ہوگیا جس کے نتیجے میں 3لاکھ روپے کا نقصان ہونے کا اندازہ لگایا گیا ہے۔

ذرایع  کے مطابق صادق نامی شخص اپنی بیوی کے ساتھ اس گھر میں رہا کرتا تھا۔ لیکن پچھلے ڈیڑھ مہینے قبل اس کی بیوی بیماری کی وجہ سے انتقال کرگئی تو وہ اپنی دوبیٹیوں صفا اور سمرین کے ساتھ کوٹے باگیلو میں اپنے رشتے داروں کے گھر جاکر رہنے لگا تھا۔ جمعہ کی شام میں وہ اپنے گھر آیا تھا اور رات آٹھ بجے تک وہاں رکا تھا ۔ پھر وہ گھر میں اگربتی سلگاکر چلایا گیاتھا۔شاید جلتی ہوئی اگربتی کسی کپڑے پر گرگئی اور اس کے بعد گھر میں کا سامان سلگ اٹھا۔

سنیچر کے دن صبح میں اس کے پڑوسی سلیم نے دیکھا کہ صادق کا گھر جل کر خاکستر ہوگیا ہے۔جائزہ لینے پر پتہ چلا کہ گھر کے سامان، ٹی وی، الماری کے علاوہ نقد چار ہزار روپے بھی جل کر خاک ہوگئے ہیں۔جملہ 3لاکھ روپے کا مالی نقصان ہونے کا اندازہ لگایا گیا ہے۔