کیف، یکم جون (ایس او نیوز/ایجنسی) یوکرین کے ڈرونز نے ماسکو کے اضلاع کو نشانہ بنایا جس پر صدر ولادیمیر پوتن نے کہا کہ یہ یوکرین میں ملٹری انٹیلی جنس ہیڈکوارٹرز پر 24گھنٹوں میں تیسری بار روسی فضائی حملے پر کیف کا‘ردِعمل’تھا-

ڈان میں شائع رپورٹ کے مطابق حملے میں ماسکو کے چند امیر ترین علاقوں کو نشانہ بنایا گیا جن میں ولادیمیر پوتن اور اشرافیہ کی رہائش گاہیں ہیں -

روسی صدر نے منگل کے اوائل میں ماسکو پر حملے کا حوالہ دیتے ہوئے سرکاری ٹیلی ویژن پر کہا کہ یوکرین کے فوجی انٹیلی جنس کے ہیڈکوارٹرز پر دو یا تین روز قبل حملہ کیا گیا تھا، جس کے جواب میں کیف حکومت نے روسیوں کو خوفزدہ کرنے کیلئے ایک مختلف راستہ اختیار کیا-

روس کی وزارت دفاع نے کہا کہ کیف کی جانب سے بھیجے گئے 8ڈرونز اور شہریوں کو نشانہ بنانے والے درونز کو مار گرایا گیا یا اس کا رخ موڑ دیا گیا، جبکہ سکیورٹی سروسز سے تعلق رکھنے والے ایک ٹیلی گرام چینل بازا کا کہنا تھا کہ اس حملے میں 25سے زیادہ ڈرونز شامل تھے -

ماسکو کے میئر کے مطابق حملے میں دو افراد زخمی ہوئے جبکہ اپارٹمنٹ کے کچھ بلاکس کو کچھ دیر کیلئے خالی کرالیا گیا تھا-دوسری جانب امریکہ نے کہا کہ وہ روس کے اندر حملوں کی پشت پناہی نہیں کرتا لیکن یوکرین کے ساتھ جنگ کی ذمہ داری ماسکو پر عائد ہوتی ہے -

امریکی محکمہ خارجہ کے ترجمان نے کہا کہ عمومی طور پر ہم روس کے اندر حملوں کی حمایت نہیں کرتے، ہم نے یوکرین کو اپنے خودمختار علاقے کو دوبارہ حاصل کرنے کیلئے ضروری سامان اور تربیت فراہم کرنے پر توجہ مرکوز کی ہے -

ترجمان نے کہا کہ امریکہ ابھی تک اندازہ لگا رہا ہے کہ ماسکو میں کیا ہوا، جہاں روس کے یوکرین پر حملے کے بعد پہلی بار رہائشی عمارتوں کو نشانہ بنایا گیا، جبکہ ولادیمیر پوتن نے اس کا الزام کیف پر لگایا-محکمہ خارجہ کے ترجمان نے دعویٰ کیا کہ روس نے مئی میں 17ویں مرتبہ منگل کو کیف میں فضائی حملہ کیا تھا-

انہوں نے کہا کہ‘روس نے یوکرین کے خلاف یہ بلااشتعال جنگ شروع کی جسے روس، یوکرین کے شہروں اور لوگوں کے خلاف روزانہ وحشیانہ حملے کرنے کی بجائے یوکرین سے اپنی افواج کو واپس بلا کر کسی بھی وقت ختم کر سکتا ہے -

گزشتہ سال فروری میں جب سے روس نے اپنے پڑوسی ملک میں فوجیں بھیجی ہیں، جنگ زیادہ تر یوکرین کے اندر لڑی گئی، حالانکہ ماسکو نے اپنی سرزمین پر کچھ حملوں کی اطلاع دی اور کہا کہ صدر ولادیمیر پوتن کے خلاف قاتلانہ حملہ کیا گیا تھا-

یوکرین کے صدارتی معاون میخائیلو پوڈولیاک نے منگل کے حملوں میں براہ راست ملوث ہونے کی تردید کی، البتہ انہوں نے کہا کہ ہمیں دیکھ کر خوشی ہوئی’اور مزید کی پیش گوئی کی-

کچھ مشرقی یوکرینی علاقوں میں روسی فوجیوں کے ساتھ 2023 کے بیشتر حصے میں تعطل کا شکار رہنے والی جنگ نے دسیوں ہزار افراد کو ہلاک کیا، لاکھوں کو اکھاڑ پھینکا، شہروں کو کھنڈرات میں تبدیل کر دیا اور عالمی معیشت میں تباہی مچا دی-

کیف نے کہا کہ منگل کو روس کے تازہ حملوں میں یوکرین کے آس پاس چار افراد ہلاک ہوئے اور دو بچوں سمیت 34 زخمی ہوئے -