اترکنڑا ڈسٹرکٹ فٹ بال اسوسی ایشن کے زیر اہتمام منعقدہ سالانہ فٹ بال لیگ ٹورنامنٹ میں بھٹکل کی بیفا ٹیم چمپئین
سرسی:24؍فروری(ایس اؤ نیوز)اترکنڑا ڈسٹرکٹ فٹ بال اسوسی ایشن نے کرناٹکا اسٹیٹ فٹ بال اسوسی ایشن کے اشتراک سے سرسی اور بیندور میں سالانہ فٹ بال لیگ چمپئین شپ 2020کا انعقاد کیا تھا ۔ 16فروری سے 23فروری تک منعقد ہوئے فٹ بال ٹورنامنٹ میں بھٹکل فٹ بال کلب نے چمپئین شپ کا خطاب جیتا۔
سرسی کے فوریسٹ کالج میں منعقد ہوئے زون اے کے مقابلہ جات میں ڈانڈیلی، ماری کامبا سرسی ، منڈگوڈ، ریونت کمٹہ کی فٹ بال ٹیموں نے حصہ لیا۔ جن میں سے ماری کامبا سرسی اور ریونت کمٹہ کی فٹ بال ٹیمیں سیمی فائنل پہنچیں۔ جب کہ بیندور میں کھیلے گئے زون بی کے مقابلہ جات میں بھٹکل، کاروار، بیفا بھٹکل ،شرور،ہوناور اور منکی کی فٹ بال ٹیمیں شریک تھیں۔ یہاں شیرور اور بھٹکل کی بیفا سیمی فائنل پہنچیں۔
سیمی فائنل میں بیفا بھٹکل نے سرسی فٹ بال ٹیم کو اور آر یو ایف سی شرور نے ریونت کمٹہ کو شکست دے کر فائنل پہنچیں۔بیفا بھٹکل اور آر یو ایف سی شرور کے درمیان کھیلے گئے فائنل کے کڑے مقابلے میں اسکور برابر رہا تو پنالٹی شوٹ کے ذریعے بیفا بھٹکل نے شیرور کو 5-3سے شکست دے کر چمپئین شپ کا خطاب جیتا۔
شرور کے سالار شیخ کو بیسٹ اسٹرائکر، عادل کو بیسٹ گول کیپر، بیفابھٹکل کے معاذ شیخ کو بیسٹ پلے میکر، ندید کاڈلی کو بیسٹ ڈیفنڈر ،جاسر ایس کے کو بیسٹ ایمرجنگ پلئیر کے ایوارڈ سے نوازا گیا۔ شیرور کے بانی ممبر واصف ایم ایچ کو اترکنڑا ڈسٹرکٹ فٹ بال اسوسی ایشن کا ہال آف فیم ایوارڈ دیاگیا۔
تقریب میں اسوسی ایشن کے سرپرست حفظ الرحمن برماور مہمان خصوصی تھے تو رنجیت کمار اعزازی مہمان تھے۔ اس موقع پر عنایت اللہ شاہ بندری ، ایم ایچ غنی ، عبدالغفور شیخ شیرور، احید محتشم، معاویہ محتشم، فہد شاہ بندری ، عرفات تونسے ، عتیق ، فواز شاہ بندری سمیت کئی لوگ موجود تھے ۔
