یلاپورتعلقہ میں زمین کھسکے مقامات کاڈی سی مہیلن کا پیدل دورہ:دیہات کے مسائل کا مستقل حل اور زمین کھسکنے کے تعلق سے ماہرین سےمطالعہ کا تیقن
یلاپور:28؍جولائی (ایس اؤ نیوز) یلاپور تعلقہ کے کلچی مضاف میں زمین کھسکنے کے معاملے کے متعلق ارضیاتی ماہرین کے ذریعے مطالعہ کرایا جائے گا۔ مقامی لوگوں کی مانگ کے تحت مستقل حل کےلئے حکومت کو پیش کش ارسال کی جائے گی۔ اترکنڑا ضلع میں حالیہ ہوئے زمین کھسکنے کے واقعات کے متعلق اترکنڑا ضلع ڈپٹی کمشنر ملئی مہیلن نے ان خیالات کا اظہار کیا۔
وہ ضلع کے مختلف مقامات پر جہاں جہاں زمین کھسکنے کے واقعات پیش آئے تھے ان مقامات کا دورہ کرنے کے بعد اخبارنویسوں سے گفتگو کررہے تھے۔ انہوں نے بتایا کہ مضاف کو جانے والا راستہ پوری طرح برباد ہوگیا ہے ، باہر کی دنیا سے ان کا رشتہ ٹوٹ گیا ہے ہماری پہلی ترجیح متبادل راستے کی تعمیر ہونے کی بات کہی۔ اس سلسلے میں محکمہ فاریسٹ اور آب پاشی کا عملہ سرگرم ہے، اگلے دو تین دنوں میں یہ ممکن ہوگا، اسی طرح دیہات کو بجلی سپلائی کے لئے محکمہ ہسکام دن رات کام کررہاہے، ہمارے اندازے سے بھی زیادہ نقصان ہواہے ظاہر ہے کہ اس کی درستی کےلئے وقت درکار ہے البتہ ہر محکمہ اپنے طور پر متحرک ہے دو تین دن میں کسی حد تک حالات بحال ہونے کی ڈی سی نے امید جتائی ۔
مضاف میں ہوئے نقصانات کے متعلق ڈی سی نے جانکاری دی کہ ابتدائی اطلاعات کے مطابق 15گھر مکمل منہدم ہوچکے ہیں۔ 28گھر وں کو کافی نقصان پہنچا ہے ، چونکہ یہاں گھر کافی دور دور ہیں تو سروے کے لئے وقت چاہئے ۔
اپنے دورے کا مقصد واضح کرتےہوئے ڈی سی نے کہاکہ دیہات کے اندر کے حالات کیسے ہیں ان کو خود دیکھنے اور معائنہ کرنے کےلئے یہاں کا دورہ کیا ہوں۔ چھوٹے چھوٹے نالوں پر مشتمل یہ علاقہ اب بڑی وادی میں تبدیل ہوچکاہے، مٹی پوری طرح بہہ گئی ہے، زمینات اور کھیتوں کے قریب بنائے گئے چک ڈیم مکمل تباہ ہوگئے ہیں۔ جس کے نتیجے میں مقامی لوگوں کو پینے کے پانی کا مسئلہ پیدا ہوگیا ہے، دیہات کے مسائل کو مستقل حل ڈھونڈنے کے لئے راستے تلاش کئے جائیں گے۔ ضلع انتظامیہ عوام کے ساتھ ہے ،عوام کو گھبرانےکی کوئی ضرورت نہیں ہونےکی بات کہی۔ اس موقع پر ڈی سی کے ساتھ اسسٹنٹ کمشنر اور تحصیلدار کے علاوہ مقامی عوامی نمائندے اور دیہی عوام ساتھ میں تھے۔
ڈی سی کا پیدل دورہ :کلچی مضاف پہنچنے کےلئے ڈی سی ملئی مہیلن نے قریب 10کلومیٹر کا راستہ پیدل طئے کیا۔ راستے کے درمیان کہیں کہیں مقامی لوگوں کے ساتھ بائک پر سوار ہوکر دیہات تک پہنچنے کی کامیاب کوشش کی ۔ راستے میں جہاں کہیں عوام سے ملاقات ہوئی ان سے بات چیت کرتے ہوئے انہیں ہمت و حوصلہ سے رہنے اور ضلع انتظامیہ ان کے ساتھ رہنے کا وعدہ کیا۔ اسی طرح اسسٹنٹ کمشنر آکرتی بنسال اور تحصیلدار شری کرشنا کامکر نے بھی الگ الگ بائک پر سوار ہوکر ڈی سی کے ساتھ موجود رہے۔