اڈپی،25 ؍اکتوبر (ایس او نیوز) مرد کے ساتھ شادی کے بغیر (لِیو اِن )رہنے والی ایک نوجوان خاتون کی مشتبہ حالات میں موت واقع ہوگئی ہے جس کے بعداس خاتون کے رشتے داروں نے اس معاملے کی تفتیش کا مطالبہ کیا ہے۔

فوت ہونے والی 21سالہ خاتون کے بارے میں بتایا جاتا ہے کہ وہ ایک24سالہ انٹیریئرڈیزائنرکے ساتھ لِیو اِ ن رشتہ بناکر گزشتہ چھ سات مہینوں سے امباگل میں مقیم تھی۔اس نے بی سی اے کر رکھاتھااور وہ کلال گیری کی رہنے والی تھی۔لیکن وہ جس کے ساتھ رہتی تھی اس  مردنے یہ بات چھپارکھی تھی کہ وہ پہلےسے شادی شدہ ہے۔ جب اس با ت کا علم ہوگیاتو وہ ڈپریشن میں چلی گئی اور مرد نے اس کو اسپتال میں داخل کروادیا ۔ مگر علاج کارگر ہونے سے پہلے اس کی  موت واقع  ہوگئی جس کے بعد وہ مرد غائب ہوگیا ہے اور اس کا موبائل فون سوئچ آف ہوگیا ہے۔ یہ بھی پتہ چلا ہے کہ فو ت ہونے والی خاتون نے  اس معاملے میں اس  مرد کی پہلی  بیوی کے ساتھ جھگڑا بھی کیا تھا۔ ان سب حالات کو دیکھتے ہوئے لڑکی کے گھروالوں نے اس معاملے کی پوری تحقیقات کرنے کا مطالبہ کیا ہے۔ اڈپی پولیس اسٹیشن  کے سب انسپکٹر شکتی ویلو نے بتایا کہ  کیس درج کرلیا گیا ہے اور ہر زاویے سے اس کی تحقیقات کی جائے گی۔