اڈپی،27؍ستمبر (ایس او نیوز) پچھلے دنوں صبح کی اولین ساعتوں میں منی پال میں چاقو کی نوک پر ایک شخص کو لوٹنے کی جو واردات انجام دی گئی تھی اس پر کارروائی کرتے ہوئے اڈپی پولیس  ایک ملزم کو گرفتار کرلیا ہے اوراب اس کے دوسرے ساتھی کی تلاش جاری ہے۔

اڈپی ضلع سپرنٹنڈنٹ آف پولیس وشنوردھن  نے تفصیلات بتاتے ہوئے کہا کہ 19 ستمبر کو دو اجنبیوں نے منی پال میں چاقوکی نوک پر ایک شخص کو لوٹ لیا تھا۔ اسی ایک ہی  دن  میں  چار مختلف مقامات پر بالکل اسی انداز میں   لوٹ کی وارداتیں انجام دئے جانے کی شکایتیں پولیس میں درج ہوئی تھیں۔ایس پی کی قیادت میں انسپکٹر منجو ناتھ اور منی پال پولیس سب انسپکٹر منجو ناتھ ایم کی ٹیم نے تحقیقات کے دوران محمد عاشق نامی ایک شخص کی نشاندہی کرلی اور اس کو گرفتار کرلیا۔

ایس پی کے بیان کے مطابق محمد عاشق کاپ کے ملّار علاقے کا رہنے والا ہے اور  ’ٹیم گروڈ‘ نامی لٹیروں کی ٹولی کا سرغنہ ہے۔اس نے اپنے ایک اور دوست کے ساتھ مل کر سنسان علاقے میں لوگوں کو دھمکایا تھا اور نقدی کے علاوہ دیگر قیمتی چیزیں لوٹنے کا کام کیا تھا۔ اس کے دوسرے ساتھی کی تلاش جاری ہے۔عاشق کے پاس سے ایک بائک، ایک اسکریو ڈرائیور، چاقو اور چوری کیا ہوا موبائل فون ضبط کرلیا گیا ہے۔پتہ چلاہے کہ ضبط کی گئی بلیٹ بائک بنگلورو کے آر ٹی نگر سے چرائی گئی تھی۔