منگل کو ہیلتھ بلٹین کے مطابق اڈپی ضلع میں 150پوزیٹیو اور 627نگیٹیو معاملات۔ ڈپٹی کمشنر نے عوام سے کہا، خوف زدہ ہونے کی ضرورت نہیں
اڈپی 3/جون (ایس او نیوز) منگل کو اُڈپی میں کورونا کے سب سے زیادہ معاملات سامنے آنے کی اطلاع موصول ہوئی تھی اور روینو وزیر آر اشوک نے بتایا تھا کہ اُڈپی میں کورونا پوزیٹو کے 210 معاملات سامنے آئے ہیں، لیکن شام کو موصول ہونے والی ہیلتھ بلٹین میں خبر دی گئی ہے کہ اُڈپی میں پیر شام پانچ بجے سے منگل شام پانچ بجے تک 150 کورونا پوزیٹو کی تصدیق ہوئی ہے۔
اس تعلق سے اڈپی ضلع ڈپٹی کمشنر جگدیش نے بتایا ہے کہ 2جون کو اڈپی میں 150پوزیٹیو کیس سامنے آئے ہیں جبکہ 627افراد کی رپورٹ نگیٹیو آئی ہے۔اتنی بڑی تعداد سامنے آنے کے بعد اُڈپی جہاں ایک ماہ پہلے تک کورونا کے کوئی معاملات نہیں تھے، کورونا سے متاثرہ لوگوں کی تعداد بڑھ کر 410ہوگئی ہے۔
ہیلتھ بلٹین کے مطابق 2 جون کو جن لوگوں کی رپورٹ پوزیٹیو آئی ہے ان میں ایک گوا، ایک تمل ناڈو اور باقی تمام 148 لوگ ممبئی اور مہاراشٹرا کے علاقوں سے لوٹے ہوئے افراد ہیں۔
ریوینیو اور میونسپل ایڈمینسٹریشن کے وزیر آر اشوک نے کل اڈپی میں متاثرین کی تعداد 210بتائی تھی۔ مگر ادھر ڈپٹی کمشنر نے یہ تعداد صرف 150بتائی ہے۔ان کے بیان کے مطابق تازہ متاثرین میں 10سال سے کم عمر کے 9بچے اور 60سال سے زائد عمر کے 3افراد شامل ہیں۔ان سب کو ضلع کے مختلف کووِڈ اسپتالوں میں علاج کے لئے داخل کیا گیا ہے۔اس لئے مریضوں کی بڑھتی ہوئی تعداد سے عوام خوف زدہ ہونے کی کوئی ضرورت نہیں ہے۔
ڈی سی جگدیش نے بتایا کہ گزشتہ تین دنوں کے اندر200سے زائد افراد کی جانچ رپورٹ پوزیٹیو آئی ہے۔ جبکہ 2000ہزار سے زیادہ افراد کی رپورٹ موصول ہوئی ہے۔ ہم لوگ ممبئی او رمہاراشٹرا کے دوسرے علاقوں سے آنے والے افراد میں سے 10فیصد لوگوں کی رپورٹ پوزیٹیو آنے کی توقع کررہے تھے۔اس لئے کہا جاسکتا ہے کہ رپورٹ ہماری توقعات کے مطابق ہی آرہی ہے۔
ڈپٹی کمشنر کا کہنا ہے کہ فی الحال پوزیٹیو مریضوں میں سے صرف 2کی حالت کچھ سنگین ہوگئی ہے، ان کے علاج پر خصوصی توجہ دی جارہی ہے۔جن پوزیٹیو معاملات میں مرض کی علامات نہیں ہیں ان کو کنداپور اسپتال میں اور حالت بہت زیاد ہ خراب ہونے والوں، بچوں، حاملہ خواتین اور معمر افراد کو اڈپی کووِڈ اسپتال میں داخل کیا گیا ہے۔