اڈپی: ’ڈر گ مافیا‘ کے خلاف پولیس کی مہم جاری رہے گی۔ تحقیقات کا دائرہ ساحلی علاقوں تک بڑھادیا گیا۔ ڈی جی پی کا بیان
اُڈپی 8؍ ستمبر (ایس او نیوز) اڈپی ضلع سپرنٹنڈنٹ دفتر میں منشیات کے خطرے سے نمٹنے کے مسئلےپر میٹنگ منعقد کرنے کے بعد ڈائریکٹر جنرل آف پولیس پروین سود نےاخباری نمائندوں سے بات چیت کرتے ہوئے کہاکہ کنڑا فلم انڈسٹری میں ڈرگ مافیا پر کریک ڈاؤن کے لئے جو تحقیقات شروع کی گئی ہیں اس کا دائرہ کار وزیر اعلیٰ کی ہدایات کے مطابق ہبلی، بیلگاوی چترادرگہ اورساحلی اضلاع تک پھیلا دیا گیا ہے اور کسی بھی حالت میں منشیات کے کاروبار کو ختم کرنے کی پوری کوشش کی جائے گی۔
آئی جی پی نے کہا کہ وہ اب تک کی گئی تحقیقات سے ابھی پوری طرح مطمئن نہیں ہیں۔ اس لئے ضلع پولیس کے افسران کے منشیات کے کاروبار پر روک تھام کے مختلف طریقوں پر غور کیا گیا ہے۔انہوں نے کہا کہ ’’ ہم ڈرگس پر ضرور قابوپائیں گے۔ چاہے وہ منشیات قدرتی ہوں، سافٹ ڈرگس، مصنوعی اور دوسرے کسی بھی قسم کے ہوں ۔ چاکلیٹس اور ڈرنکس میں بھی ڈرگس کا استعمال ہورہا ہے۔بنگلورو اور منگلورو منشیات کے بڑے اہم گڑھ بن گئے ہیں۔ ہم نے پولیس افسران کو ہر قسم کی منشیات فروشی اور اس کے استعمال کو جڑ سے ختم کرنے کی ہدایت دی ہے۔اب یہ ان کی ذمہ داری ہے کہ اس ہدایت پر عمل کرکے نتائج سامنے لائیں۔‘‘
آئی جی پروین سود نے کہا:’’ ریاستی حکومت نے ہم کو منشیات پر قابوپانے کے لئے تمام اقدامات کرنے کی کھلی چھوٹ دے دی ہے۔اور ہدایت دی ہے کہ کرناٹکا کو منشیات سے پاک ریاست میں تبدیل کیا جائے۔ہم سمندری، زمینی یا ہوائی راستے سے آنے والی تمام منشیات پر روک لگانے کے لئے مہم چلارہے ہیں۔‘‘
انسپکٹر جنرل نے مزید یہ بھی بتایا کہ عوام کو درپیش مشکل صورت حال میں پولیس سے رابطہ کرنے کے لئے نیا 112نمبر جاری کیا جارہا ہے تاکہ عوام کے لئے پولیس کی مدد زیادہ مؤثر انداز میں فراہم جاسکے ۔ مشکل وقت میں اس 112کے ایک ہی نمبر پر فون کرنے سے پولیس کی طرف سے فوری راحت اور مدد پہنچانے کا کام کیا جائے گا۔