کنداپور : کورگا مہندی تقریب پر کوٹا پولیس کا دھاوا ۔ سب انسپکٹر معطل ۔ پانچ اہلکاروں کا تبادلہ
کنداپور : 29/دسمبر (ایس او نیوز) کنداپور تعلقہ کے کوٹا میں کورگا طبقہ کی کالونی میں منائی جارہی تقریب کے دوران ڈی جے بجائے جانے کو مسئلہ بنا کر پولیس نے جو دخل اندازی کی تھی اور ہنگامہ کھڑا کرتے ہوئے لاٹھی چارج کیا تھا اس معاملہ میں ذمہ دار کوٹا پولیس اسٹیشن کے سب انسپکٹر سنتوش کو معطل کیا گیا ہے ۔
اڈپی سپرنٹنڈنٹ آف پولیس وشنووردھن کی طرف دی گئی تحقیقاتی رپورٹ پر کارروائی کرتے ہوئے انسپکٹر جنرل آف پولیس ویسٹرن رینج نے سب انسپکٹر کو معطل کرنے کے احکامات جاری کیے اور لاٹھی چارج میں ملوث دیگر پانچ پولیس اہلکاروں کا بھی تبادلہ کردیا ۔
یاد رہے کہ کنداپور کے کوٹاتھٹو علاقے میں کورگا کالونی میں یہ واقعہ پیش آیا تھا جس میں دولھا سمیت مہندی تقریب میں شامل کورگا طبقہ کے دیگر افراد پر بھی پولیس نے زیادتیاں کی تھیں ۔ اس کے خلاف دلت تنظیموں کے علاوہ اقلیتی طبقات کے لیڈروں نے سخت احتجاج کیا تھا اور متعلقہ پولیس والوں کے خلاف کارروائی کی مانگ کی تھی ۔