بھٹکل 17 جنوری (ایس او نیوز) قریب چار ماہ قبل ماہ ستمبر میں مرڈیشور کے اسکولوں میں چوری کرنے کے الزام میں اُڈپی پولس کے ذریعے گرفتار کئے گئے دو چوروں کو آج منگل کو بھٹکل پولس اسٹیشن لایا گیا، پھر مرڈیشور کے متعلقہ اسکولوں میں لے جاکرسوالات کئے گئے۔
پتہ چلا ہے کہ ضلع اُڈپی کے کوٹا میں چند روز قبل دو مبینہ چوروں کو گرفتار کیا گیا تھا جن پر متعدد مکانوں سمیت 25 سے زائد اسکولوں میں بھی چوری کئے جانے کے الزامات ہیں۔ چھان بین سے پولس کو پتہ چلا کہ ان دونوں نے مرڈیشور کے اسکولوں میں بھی چوری کی تھی، اسی بنیاد پر دونوں مبینہ چوروں کو بھٹکل لایا گیا پھر مرڈیشور کے اسکولوں میں لے جاکر تفتیش کی گئی۔
گرفتار شدگان کی شناخت گوکرن کے رہنے والے کماراسوامی (59) اورہیجماڈی (ضلع اُڈپی) کے رہنے والے زاہد سینان (32) کی حیثیت سے کی گئی ہے۔
پولس نے ان دونوں کو مرڈیشور اسکولوں میں ہوئی چوری میں بھی ملوث بتاتے ہوئے بھٹکل عدالت میں پیش کیا ہے۔ مزید چھان بین جاری ہے۔
Related News