اڈپی،22؍اکتوبر(ایس او نیوز) سٹی بس میں سفر کے دوران اپنی ساتھی مسافر کی بیگ سے نقد رقم اور اے ٹی ایم کارڈ زچرانے کی ملزم 3چور خواتین کو اڈپی پولیس نے واردات کے 12گھنٹوں کے اندر گرفتار کرلیا ہے۔
اطلاع کے مطابق گرفتار کی گئی تینوں خواتین بلاری کی رہنے والی ہیں اور ان کے نام لتا، کویتا اور سبیتا ہیں۔ یہ تینوں شہر کے کونجی بیٹوعلاقے سے سٹی بس میں سوار ہوئیں اور پہلے سے بس میں سفر کررہی ایک خاتون مسافر ارچنا راؤکے قریب جاکر کھڑی ہوگئیں۔ پھر ان کے پاس جو چھوٹا سا بچہ تھا اس کو ارچنا راؤ کے پاس تھامنے کے لئے دے دیا۔ اس دوران ان تینوں نے بڑی چالاکی کے ساتھ ارچنا کی بیگ سے اے ٹی ایم کارڈز، نقد رقم اور کچھ دستاویزات اڑا لیے اور ارچنا کو اس کی بھنک تک نہیں لگی۔ بس سے اتر کر ان کے چلے جانے کے بعد جب تک ارچنا کواس چوری کا پتہ چلا ، تب تک ان تینوں نے اے ٹی ایم کارڈ کا استعمال کرتے ہوئے ارچنا کے اکاؤنٹ سے 25 ہزار روپے نکال لیے تھے۔
ارچنا نے اڈپی پولیس اسٹیشن میں شکایت درج کروائی تو پولیس حرکت میں آگئی،اور اس نے ضلع کے دوسرے پولیس اسٹیشنوں سے متعلقہ افسران کو بھی اس واردات کی اطلاع دے دی۔ اس دوران پتہ چلا کہ ان تینوں نے دھارواڑ جانے کے لئے ٹکٹس بک کرلیے ہیں تو مقامی افراد اور رکشہ ڈرائیوروں کی مدد سے انہیں گرفتار کرلیا گیا۔ملزمین کے پاس سے 32000ہزار روپے نقد، دو موبائل فون اور دو اے ٹی ایم کارڈز بر آمد کرلیے گئے ہیں۔شکایت ملنے پر چوکسی دکھانے اور 12 گھنٹوں کے اندر ملزمین کو گرفتار کرنے پر عوام کی طرف سے پولیس کی بہت زیادہ ستائش کی جارہی ہے۔