اڈپی،23؍اکتوبر(ایس او نیوز) اڈپی پولیس نے  تنہا عورتوں سے زیورات لوٹنے کے لئےبدنام زمانہ ’ایرانی گینگ‘ کے چار لٹیروں کو گرفتار کرنے میں کامیابی حاصل کی ہے۔گرفتارشدگان کے نام  ذاکر حسین (24سال)، کمبار رحیم مرزا (32سال)، اکشئے سنجے گوساوی (22سال) اور شاہ رخ بندے نواز شیخ (24سال) بتائے گئے ہیں۔

موصولہ رپورٹ کے مطابق اس گینگ کا طریقہ کار یہ ہے کہ وہ سڑک پر چل رہی تنہا عورتوں کو اپنے نشانے پر لیتے ہیں۔ پھر موٹر بائک پر سواردو لٹیرے  ا ن کے قریب جاکر اس سڑک پر آگے کچھ لٹیرے ہونے کی بات بتاتے ہوئے خوفزدہ کرتے ہیں اور ان سے اپنے گلے کے زیورات اتار کر پرس یا بیگ میں رکھنے کا مشور ہ دیتے ہیں۔ جب عورتیں انہیں اپنا خیر خواہ سمجھ کر اپنے زیورات اتارلیتی ہیں تو یہ لوگ ان کے ہاتھ سے   وہ زیورات جھپٹ کر فرار ہوجاتے ہیں۔تھوڑی دور جاکر وہاں ان کا انتظار کرہی کار میں  موجود دو ساتھیوں سے اپنی موٹر بائک بدل لیتے ہیں اور خود کپڑے بدل کر کار چلاتے ہوئے دور نکل جاتے ہیں  جبکہ کار والے ساتھی موٹر بائک پر سوار ہوکر آرام سے اس علاقے سے فرار ہوجاتے ہیں۔اس طرح ان کا پیچھا کرنے یا انہیں تلاش کرنے والوں کو جھانسہ دینے میں وہ کامیاب ہوجاتے ہیں۔

پولیس کا کہنا ہے کہ اس نے  گرفتار کیے گئے لٹیروں کے پاس سے کچھ سونے کے  زیورات بر آمد کرلیے ہیں  ۔  لوٹے گئے کچھ  زیورات چوروں نےسری رامپورا  اوراحمد نگر میں فروخت کیے تھے وہ بھی برآمد کرلیے گئے ہیں۔اس کے علاوہ ایک کار اور دو موٹر بائکس بھی ضبط کرلی گئ ہیں۔ ضبط کی گئی اشیاء کی مالیت کا اندازہ  7لاکھ روپے لگایا گیا ہے۔