اڈپی 7/اکتوبر (ایس او نیوز) سنگاپور میں منعقدہ باڈی بلڈنگ چیمپئن شپ مقابلے میں ساحلی کرناٹکا سے تعلق رکھنے والے رمیض نے ’مسٹر ایشیاء‘ کا خطاب جیت لیا ہے اور اس کے ساتھ پروکار ڈ(پروفیشنل کارڈ) پانے والا کرناٹکا کا پہلا باڈی بلڈر بننے کا اعزاز بھی حاصل کرلیا ہے۔

سنگاپور میں 38 ہندوستانی باڈی بلڈرز نے مختلف زمروں میں مقابلہ کیااور بہت ہی شاندار کارکردگی کا مظاہرا کیا۔ان میں سے رمیض واحد باڈی بلڈر ہے جس نے گولڈ میڈل جیتا ہے۔جبکہ دیگر باڈی بلڈرس میں ایک نے سلور میڈل اور پانچ نے کانسے کا (براونز) میڈل جیتا ہے۔

بتایا گیا ہے کہ رمیض کامقابلہ15 ایشیائی ممالک کے 32باڈی بلڈرس کے ساتھ تھا۔اس نے چمپیئن شپ جیتنے کے ساتھ اس ’فیزیک‘ کے زمرے میں ’پرو کارڈ‘ کا بھی تمغہ اپنے نام کرلیا۔ خیال رہے کہ ہندوستان میں اس وقت جملہ 10باڈی بلڈرس ایسے ہیں جن کو ’پروکارڈ‘ ملاہے۔ جبکہ کرناٹکا سے رمیض یہ کارڈ پانے والا پہلا باڈی بلڈر بن گیا ہے۔یہ کارڈ پانے کے بعد رمیض آئندہ صرف پروکارڈ رکھنے والے یعنی پیشہ ور باڈی بلڈرس کے ساتھ مقابلہ کرے گا اور اسے شوقیہ (امیچر) باڈی بلڈرس کے ساتھ مقابلہ کرنے کی ضرورت باقی نہیں رہے گی۔رمیض نے اس موقع پر اپنی انتہائی مسرت کا اظہار کرتے ہوئے کہا کہ ”پرو کارڈ پاناباڈی بلڈنگ کے پیشے میں ایک بہت ہی کم یاب موقع ہوتا ہے۔ اب میں بہت ہی سنجیدگی کے ساتھ محنت کروں گا کیونکہ میرا اگلا نشانہ مسٹر ورلڈ کا خطاب جیتنا ہے جہاں پر میرا مقابلہ دنیا کے اعلیٰ ترین باڈی بلڈرس کے ساتھ ہوگا۔“