اڈپی7/اپریل (ایس او نیوز) کورونا وائرس وباء کے تعلق سے ضلع اڈپی کی جو تازہ صورتحال ہے اس کے مطابق 6اپریل کی شام تک یہاں سے جملہ 36مشتبہ افراد کے گلے سے لیے گئے تھوک کے نمونے جانچ کے لئے شیموگہ لیباریٹری میں بھیج دئے گئے ہیں۔

ڈی ایچ او ڈاکٹر سدھیرچندرا سوڈ نے بتایا کہ جن 36افراد کے نمونے حاصل کیے گئے ہیں ان میں براہ راست وائرس سے متاثر ہونے کے شبہ میں ایک شخص، بالواسطہ متاثر ہونے کے شبہ میں 32افراداور سانس لینے میں تکلیف کی شکایت کرنے والے تین افراد شامل ہیں۔ان کی رپورٹس ایک دو دن میں موصول ہونے کی توقع ہے۔

جبکہ ضلع جنوبی کینرا سے ملی خبر کے مطابق 6اپریل کے دن جملہ 21افراد کی رپورٹ نگیٹیو آئی ہے۔اس سے ضلع جنوبی کینرا کی انتظامیہ اور میڈیکل ٹیم کو کچھ راحت محسوس ہوئی ہے۔ضلع ڈپٹی کمشنر کی طرف سے جاری کردہ بیان کے مطابق6اپریل کو جملہ 21افراد کی اسکریننگ کی گئی جس کی وجہ سے اب تک اسکریننگ کیے گئے افراد کی تعداد بڑھ کر38,652ہوگئی ہے۔ جبکہ 10نئے افراد کے گلے سے حاصل کیے گئے تھوک کے نمونے جانچ کے لئے لیباریٹری میں بھیج دئے گئے ہیں۔اس سے پہلے بھیجے گئے نمونوں میں سے 10 کی رپورٹ آنا ابھی باقی تھی، اس طرح تازہ نمونوں کے ساتھ جنوبی کینرا میں فی الحال 20افراد کی رپورٹس کا انتظار کیا جارہا ہے۔