اڈپی میں نابالغ ہندو لڑکی کامبینہ اغواء۔ سنگھیوں نے کیا احتجاجی مظاہرہ۔ لگایا ’لوجہاد‘ کا الزام
اڈپی،31؍اکتوبر (ایس او نیوز) تین دن پہلے ایک ہندونابالغ لڑکی کا اغواء مسلم نوجوان کی طرف سے کیے جانے کا الزام لگاتے ہوئےہیری اڈکا پولیس اسٹیشن کےسامنے بشمول بی جے پی دیگر ہندونواز سنگھی تنظیموں نے احتجاجی مظاہرہ کیا اور اے ایس پی کے توسط سے سپرنٹنڈنٹ آ ف پولیس کےنام میمورنڈم پیش کیا۔
احتجاجی مظاہرین نے اس معاملے کو ’لوجہاد‘ سے تعبیر کرتے ہوئے لڑکی کو تلاش کرنے اور اس معاملے میں ملوث افراد کے خلاف سخت ترین کارروائی کرنے کا مطالبہ کیا۔ میمورنڈم وصول کرنے کے بعد مظاہرین سے خطاب کرتے ہوئے اے ایس پی جئے شنکر نے کہا :’’ ایس پی کی قیادت میں اس معاملے کی تحقیق کے لئے چار ٹیمیں پہلے ہی تشکیل دی جا چکی ہیں۔ اس واقعے کا سی سی ٹی وی فوٹیج بھی پولیس کو مل چکا ہے۔ ملزم کوڈھونڈ نکالنے کے لئے منصوبہ بندی سے کام ہورہا ہے اور اس کو جلد ہی گرفتار کرلیا جائے گا۔ اس وقت تفتیش کس مرحلے میں ہے اس بارے میں کوئی معلومات دی نہیں جاسکتی۔کیونکہ اس سے ملزم کی گرفتاری میں رکاوٹ پیدا ہوسکتی ہے۔ہمیں پورا یقین ہے کہ ہم اس کو گرفتار کرلیں گے ، بس ہمیں ہر ایک سے تعاون کی ضرورت ہے۔‘‘
احتجاجی مظاہرین نے منتشر ہونے سے پہلے اسسٹنٹ سپرنٹنڈنٹ آف پولیس کو وارننگ دی کہ اگر ملزم کو جلد ہی گرفتار نہیں کیا گیا تو پھر بڑے پیمانے پر زبردست احتجاجی مظاہرا منعقد کیا جائے گا۔