اڈپی،10؍ستمبر (ایس او نیوز) کارکلا کے کوکندور میں واقع پرگتی سینٹر نامی عیسائی عبادت گاہ پر ہندووں کا مذہب تبدیل کروانے کا الزام لگاتے ہوئے ہندو جاگرن ویدیکے  کے کارکنان نے اس وقت اچانک دھاوا بول دیا۔
    
ایچ جے وی کارکنان کے اچانک حملے سے پرگتی سینٹر کے اندر عبادت میں مشغول افراد حیرت زدہ رہ گئے ۔ ایچ جے وی والوں کو کہنا ہے کہ کسی بھی قانونی اجازت نامہ کے بغیربینڈکٹ  نامی شخص  کے ذریعے چلائے جارہے اس مرکز میں خواتین اور بچوں کا مذہب  تبدیل کیا جارہا ہے ۔ حملہ آوروں اور عبادت میں مصروف افراد کے درمیان کچھ دیر تک بڑی گرما گرم بحث اور تکرار ہوئی ۔ پھر پولیس کی مداخلت کے بعد حالات پر قابو پالیا گیا ۔
    
ایچ جے وی کے لیڈر پرکاش کوکیہلّی نے بتایا کہ " اس ضلع میں بہت برسوں سے مذہب تبدیل کرنے کا سلسلہ چل رہا ہے ۔ کرسچین مشنریز کے ذریعے سیکڑوں ہندووں کو عیسائی مذہب میں داخل کیا گیا ہے ۔ اس مسئلہ پر ایچ جے وی بڑی عرصہ سے احتجاج کررہی ہے ۔ چونکہ اس مرکز کی سرگرمی کے تعلق سے ہمیں مصدقہ اطلاعات ملی تھیں اس لئے ہم نے حملہ کردیا ۔ حکومت نے گنیش اتسوا منانے کے لئے محدود اجازت دی ہے جبکہ دعائیہ اجلاس کے نام پر مذہب تبدیل کرنے کے پروگرام بے روک ٹوک ہورہے ہیں ۔ پرکاش نے وارننگ دیتے ہوئے کہا کہ ساحلی علاقہ میں ایسے بہت سے سینٹرز چل رہے ہیں اگر پولیس نے ان کے مناسب خلاف اقدام نہیں کیا تو پھر ہمارے حملے جاری رکھیں گے ۔"
    
عبادت گاہ کے منتظمین کی طرف سے اس حملہ کے خلاف کارکلا پولیس اسٹیشن میں شکایت درج کروائی گئی ہے ۔ جبکہ معلوم یہ بھی ہوا ہے کہ سینٹر کے منتظم بینڈکٹ کی جانب سے بھی حملہ آوروں کے خلاف شکایت درج ہوئی ہے ۔