اڈپی : سمندر میں تیز ہواوں کی وجہ سے ماہی گیری متاثر
اڈپی،28/ مارچ (ایس او نیوز) گزشتہ دو چار دنوں سے گہرے سمندر میں چل رہی تیز ہواوں کی وجہ سے مچھلیوں کے شکار کی سرگرمیاں متاثر ہوگئی ہیں ۔
معلوم ہوا ہے کہ مہاراشٹرا، گوا اور کرناٹکا کے گہرے سمندر میں شمال کی طرف سے تیز ہوائیں چل رہی ہیں ۔ اس وجہ سے اکثر پرسیئن ماہی گیر کشتیاں ملپے بندرگاہ پر لنگر انداز ہیں ۔ اس کے علاوہ ٹرالر اور دیگر چھوٹی کشتیاں بھی سمندر سے واپس کنارے پر آ گئی ہیں ۔ اس طرح ماہی گیری کی سرگرمیاں بڑی حد تک رکی ہوئی ہیں ۔
ماہی گیروں کا کہنا ہے کہ اگر ہواوں کی رفتار 15 سے 20 کلو میٹر فی گھنٹہ کے اندر رہتی ہے تو پھر مچھلیوں کا شکار کرنا آسان ہوتا ہے ، لیکن اس وقت جو ہوائیں چل رہی ہیں ان کی رفتار 35 سے 40 کلو میٹر فی گھنٹہ ہے ۔ اس کی وجہ سے سمندریں لہروں میں زبردست اچھال آ گیا ہے ۔ جو ماہی گیری کے لئے خطرناک ہے ۔ اس لئے گہرے سمندر میں کسی خطرے سے بچنے کے لئے ہواوں کی رفتار کم ہونے تک ماہی گیری روک دی گئی ہے ۔
محکمہ ماہی گیری کے ڈپٹی ڈائریکٹر شیوا کمار نے بتایا کہ تیز ہواوں کی وجہ سے سمندری لہریں خطرناک ہوگئی ہیں اور ماہی گیروں کے لئے سمندر میں جال بچھانا ممکن نہیں ہو رہا ہے ۔ 40%کے قریب ماہی گیر کشتیاں ملپے بندرگاہ پر لنگر انداز ہیں ۔ آئندہ دو تین دنوں میں ہواوں کی رفتار کم ہونے کی توقع کی جا رہی ہے ۔