اڈپی: اسپتال میں لاش بدلنے کے بعد سرکاری پالیسی میں ہوئی ترمیم۔ لاش حوالے کرتے وقت رشتے داروں سے شناخت کروانا ضروری
اڈپی، 25؍اگست (ایس او نیوز)کووڈ پروٹوکول کے تحت اسپتال میں فوت ہوجانے والے مریض کی لاش کو پوری طرح پیک کرکے رشتے داروں کے حوالے کرنا ضروری ہے۔ لیکن دو دن پہلے اڈپی کے اسپتال میں لاش تبدیل ہونے اور کسی اور شخص کی لاش رشتے داروں کے حوالے کیے جانے کا جو واقعہ پیش آیا تھا اس پس منظر میں اب سرکاری قانون میں ترمیم کی گئی ہے۔
ریاستی وزیر داخلہ اور اڈپی ضلع انچارج وزیر بسواراج بومئی نے مقامی ایم ایل اے اور ضلع انتظامیہ کے افسران کے ساتھ ویڈیو کانفرنس میٹنگ کرکے ہدایات دیتے ہوئے کہا ہے کہ آئندہ اسپتال میں کووڈ سے یا پھر کسی اور مرض کی وجہ سے فوت ہونے والے شخص کی لاش اس کے رشتے داروں کے حوالے کرنے سے پہلے کسی رشتے دار کی طرف سے شناخت کروانا ضروری ہوگا۔اس کے علاوہ کووڈ کی وجہ سے فوت ہونے والے شخص کی لاش گھر والوں کے حوالے کرتے وقت ایک ہیلتھ آفیسر کا موقع پر موجود رہنا لازمی ہوگا۔