اڈپی:مویشیوں کی غیر قانونی سپلائی میں ملوث ملزم پولیس اہلکار سنتوش شیٹی نے کی خودکشی کی کوشش
اڈپی 24/جولائی (ایس او نیوز) غیر قانونی طور پر قصائی خانوں کے لئے جانورسپلائی کرنے والے گروہ کے ساتھ ساز باز کرنے اور رشوت لے کر چیک پوسٹس پر سے جانوروں کو آسانی سے ٹرانسپورٹ کرنے کے الزام میں پھنسے ہوئے کوسٹل سیکیوریٹی پولیس (سی ایس پی) کے اہلکار سنتوش شیٹی نے خودکشی کی کوشش کی ہے۔
کچھ دن پہلے کوٹہ پولیس اسٹیشن کے انسپکٹر نتیا نندا گوڈا نے 21بھینسے بھری ہوئی ایک بڑی لاری اور اس کی حفاظت کے لئے پیچھے رہنے والی کار ضبط کی تھی۔ پولیس کا کہنا ہے کہ تحقیقات کے دوران غیر قانونی طور پر جانور سپلائی کرنے والوں نے بتایا کہ مختلف مقامات پر چیک پوسٹ سے گزرنے کے لئے انہیں پولیس کے کچھ افراد کی حمایت حاصل ہے جس کے بدلے وہ انہیں رقم اداکرتے ہیں۔ اس طرح جن چار پولیس والوں کے نام سامنے آئے تھے اس میں دو کو گرفتار کیاگیا تھا اور دو پولیس والے مفرور بتائے جاتے ہیں۔
کوسٹل پولیس کے ملپے اسٹیشن سے وابستہ سنتوش شیٹی کو گرفتار کرکے عدالتی حراست میں بھیجا گیا تھا۔کل عدالت نے اسے ضمانت پر رہا کردیا تو اس نے آدی اڈپی میں واقع اپنے گھر آنے کے بعد اس نے کچھ گولیاں کھاکر خودکشی کی کوشش کی۔ سنتوش کی بیوی کا کہنا ہے کہ جب اس کاشوہر بڑی دیر تک اپنے کمرے سے باہر نہیں نکلاتو اس نے کمرے میں جاکر اسے جگانے کی کوشش کی جس کے دوران پتہ چلا کہ سنتوش نے گولیاں کھائی ہیں۔ پھر مقامی لوگوں کی مدد سے سنتوش شیٹی کو منی پال اسپتال میں منتقل کیا گیا جہاں علاج کے بعد اس کی حالت خطرے سے باہربتائی جارہی ہے۔