اڈپی ضلع کی تمام سرحدیں کل بدھ سے ہونگی سیل ڈاؤن؛ البتہ ضلع کے اندر نہیں ہوگا مکمل لاک ڈاؤن؛ ڈپٹی کمشنر کا اعلان
اُڈپی 14 / جولائی (ایس او نیوز) اُڈپی کے ڈپٹی کمشنر نے اعلان کیا ہے کہ کل بدھ 15 جولائی سے آئندہ 14 دنوں تک کے لئے ضلع اُڈپی کی تمام سرحدیں سیل ڈاون کردی جائیں گی اس دوران کسی کو بھی ضلع کے اندر داخل ہونےیا ضلع سے باہر نکلنے نہیں دیا جائے گا۔
آج منگل کو اڈپی ضلع کے ڈپٹی کمشنر جی جگدیشا نے منتخب عوامی نمائندوں اور افسران کے ساتھ میٹنگ میں کورونا کی بے قابو ہوتی صورت حال کا جائزہ لیا جس کے بعداس بات کا فیصلہ لیا گیا کہ کل بدھ 15 جولائی کو رات سے آئندہ 14 دنوں کے لیے اڈپی ضلع کی تمام سرحدیں سیل ڈاؤن کردی جائیں گی.
میٹنگ کے بعد ڈپٹی کمشنر نے اعلان کیا کہ ضلع میں مکمل طور پر لاک ڈاؤن پھر سے لاگو کرنے کے بجائے سرحدیں سیل کرنے کا فیصلہ کیا گیا ہے. اس لئے اڈپی ضلع میں داخل ہونے یا باہر جانے کی خواہش رکھنے والوں کے لیے بدھ کی رات 8 بجے تک موقع رہے گا. پھر اس کے بعد سرحدوں کو مکمل طور پر سیل ڈاؤن کردیا جائے گا اور کسی کو بھی ضلع میں آنے یا جانے کی اجازت نہیں رہے گی. اس کے علاوہ ریاستی حکومت کے حکم کے مطابق اتوار کے مکمل لاک ڈاؤن پر بھی مکمل عمل کیا جائے گا.
میٹنگ میں مقامی ایم ایل اے رگھوپتی بھٹ، کارکلا ایم ایل اے سنیل کمار، بیندور ایم ایل اے بی ایم سوکمار شیٹی، کاپ ایم ایل اے لالاجی مینڈن اور کنداپور ایم ایل اے سرینواس شیٹی کے علاوہ ضلع پنچایت سی ای او پریتی گہلوت، ضلع ایس پی وشنووردھن، ایڈیشنل ڈی سی سدا شیو پربھو اور دیگر افسران موجود تھے۔