بیلتنگڈی 24؍اپریل (ایس اونیوز) گہرے سمندر میں مچھلی کے شکار کے لئے ملپے سے نکلنے والی’سری سائی سدّی‘ نامی ایک کشتی گوا کے مالوان علاقے میں غرقاب ہوگئی ۔یہ کشتی ملپے کی رہنے والی روشنی ایس کوندر کی ملکیت بتائی جاتی ہے۔

اس کشتی پر ضلع شمالی کینرا سے تعلق رکھنے والے 6ماہی گیر سوار تھے جنہیں غرقاب ہونے والی کشتی کی مدد کو پہنچنے والی دیگر دو ماہی گیر کشتیوں نے بحفاظت بچالیا ہے۔معلوم ہوا ہے کہ کشتی کی غرقابی کا یہ واقعہ مالوان کے قریب 40ناٹیکل میل کی دوری پر پیش آیا ہے۔مدد کے لئے جانے والی کشتیوں نے غرقاب ہوتی کشتی کو بھی بچانے اور اسے کنارے تک کھینچ لانے کی بہت کوشش کی لیکن وہ اس میں کامیاب نہیں ہوسکے۔ اور 8ہزار لیٹر ڈیزل، مچھلی پکڑنے کے جال اور شکار کی گئی مچھلیوں سمیت کشتی سمندر میں ڈوب گئی جس کی وجہ سے ہونے والے نقصان کا اندازہ 80لاکھ روپے لگایا گیا ہے۔