اُڈپی اے پی سی آر ضلع صدر کی حیثیت سے وکیل حسین کوڑی بینگرے دوبارہ متفقہ طورپر منتخب : ضلع کمیٹی کی طرف سے کئی قانونی خدمات کا تذکرہ
اُڈپی:4؍ اپریل(ایس اؤ نیوز)اےپی سی آر کرناٹکا چاپٹر کے ریاستی صدر ایڈوکیٹ پی عثمان اور ریاستی سکریٹری اڈوکیٹ محمد نیاز کی اُڈپی آمد پر منعقدہ انتخابی نشست میں حسین کوڑی بینگرے کو دوبارہ صدر کے عہدہ پر منتخب کیا گیا جبکہ ضلعی جنرل سکریٹری کے طور پر ایڈوکیٹ شابان متفقہ طورپر منتخب ہوئے۔
اُڈپی ضلع اے پی سی آر کے نائب صدر کی حیثیت سے صلاح الدین عبداللہ ، خازن کے کے طور پر منصور نکود ،جوائنٹ سکریٹری کے طور پر وسیم عبداللہ اور میڈیا سکریٹری کے طور پر محمد شاہ رخ کا انتخاب عمل میں آیا۔
اس موقع پر اُڈپی ضلع اے پی سی آر کی طرف سے انجام دی گئی قانونی خدمات کا تذکرہ کرتےہوئےکہا گیا کہ اے پی سی آر کی ضلع کمیٹی نے کوڈوؤر مسجد کے متنازعہ معاملےکو لے کر مسجد ذمہ داران سے ملاقات کرتے ہوئے دستاویزات میں مسجد کانام درج کرانے میں کامیابی حاصل کی ہے۔ کارکلا میں دلتوں پر ہوئے حملے کے موقع پر اے پی سی آر اُڈپی کی ضلع کمیٹی نے قانونی رہنمائی کرتےہوئے ان کا تعاون کیا ہے۔ کنداپور میں گائے حفاظت کے نام پر کورگا نامی طبقے پر ہوئے حملے کے دوران اُڈپی کی ضلع کمیٹی نے جائے وقوع کا دورہ کرتےہوئے تمام معاملات کا معائنہ کیا اور ان کے ساتھ کام کررہی ہے۔ محمد حنیف قتل معاملےمیں قانونی رہنمائی کررہے ہرش مندر کی ٹیم کا تعاون کیاگیا ۔ ضلع میں اوقاف کی جائیداد پر قبضہ کے خلاف قانونی لڑائی جاری ہے۔ کنڈلور کےنوجوان پر حملہ ہوا تو اے پی سی آر کی قیادت میں ہی قانونی لڑائی لڑی گئی ۔ اس کے علاوہ دیگر ایسے کئی حقوق انسانی کی خدمات انجام دینےکی بات کہی گئی۔