اڈپی11مئی (ایس او نیوز) گہرے سمندر میں ماہی گیری کے دوران تاحال کسی نامعلوم وجہ سے سات مچھیروں سمیت مہاراشٹرا کے قریب مالوان میں غرقاب ہونے والی ’سوورنا تریبھوجا‘کشتی کے متاثرہ خاندانوں کو فی کس 10لاکھ روپے سرکاری امداد دینے کا فیصلہ کیا گیا ہے۔ اس بات کی اطلاع اڈپی ضلع انچارج وزیر ڈاکٹر جئے مالا نے دی ہے۔

    خیال رہے کہ غرقاب کشتی میں اڈپی کے چندرا شیکھر کوٹیان، دامودر سالیان، ضلع شمالی کینرا مادن گیری کے ستیش ہری کنترا، کمٹہ کے لکشمن ہری کنترا، بھٹکل تعلقہ آلودے کوڈی کے ہریش موگیر، بندر روڈ کے رمیش موگیر، ہوناور تعلقہ منکی کے روی ہری کنترا نامی مچھیرے موجود تھے جن کے تعلق سے ابھی تک کوئی واضح بات معلوم نہیں ہوئی ہے، جبکہ کشتی ملبہ سمندر کی تہہ میں موجود ہونے کی تصدیق کی گئی ہے۔  

    ڈاکٹر جئے مالا نے بتایا کہ ریاستی سرکار کی طرف سے منظور کی گئی یہ امدادی رقم براہ راست مچھیروں کے وارثوں کے کھاتے میں جمع کردی جائے گی۔ اس سے پہلے لاپتہ مچھیروں کے خاندان والوں سے بانڈ اور دوسرے ضروری دستاویز لیے جائیں گے۔اس سے قبل عبوری راحت کے طور پر ان گم شدہ ماہی گیروں کے خاندان والوں کو فی کس ایک لاکھ روپے دئے جاچکے ہیں۔اب جو دس لاکھ روپے فی کس امدادی رقم منظور کی گئی ہے اس میں فشریز ڈسیاسٹر ریلیف فنڈ سے 6لاکھ روپے اور چیف منسٹر ریلیف فنڈ سے 4لاکھ روپے ادا کیے جائیں گے۔

    انہوں نے مزید کہا کہ اپنی زندگی گزربسر کرنے کے لئے سمندروں میں ماہی گیری کا خطرہ مول لینے والوں کی جتنی بھی امداد کی جائے کم ہے۔ اس لئے ریاستی حکومت کی طرف سے مرکزی حکومت سے بھی سفارش کی جائے گی کہ متاثرہ خاندانوں مرکزی فنڈ سے بھی راحت فراہم کی جائے۔