ممبئی28/نومبر (ایس او نیوز) شیوسینا چیف اُدھو ٹھاکرے نے آج جمعرات کو مہاراشٹرا کے 18 ویں وزیراعلیٰ کا حلف لیا۔ بھگوا رنگ کے کپڑے پہنے اُڈھو ٹھاکرے نے مراٹھی میں حلف لیا۔ انہوں نے جیسے ہی کہا کہ میں اُدھو بالا صاحب ٹھاکرے۔۔۔ ویسے ہی پورے شیواجی پارک میں شیو سینا کے کارکنوں کی طرف سے زبردست نعرے بازی شروع کی گئی،اس دوران زبردست آتش بازی بھی دیکھنے کو ملی۔
59 سالہ اُدھوٹھاکرے شیو سینا سپریمو انجہانی بالا صاحب ٹھاکرے کے سب سے چھوٹے فرزند ہیں ، انہوں نے ممبئی کے دادر میں واقع تاریخی شیواجی پارک میں گورنر بھگت سنگھ کوشیاری کے ہاتھوں عہدہ اور رازداری کا حلف لیا۔اس کے ساتھ ہی ادھو ٹھاکرے کو یہ شرف حاصل ہوگیا ہے کہ وہ مہاراشٹرا کے طاقتور سیاسی خاندان بال ٹھاکرے فیملی کے واحد چشم و چراغ ہیں جو وزیر اعلی کی کرسی تک پہنچنے میں کامیاب ہوئے ہیں۔
اُدھو کے ساتھ ساتھ شیو سینا، این سی پی اور کانگریس پر مشتمل مہاراشٹرا وکاس اگھادی کے چھ دیگر ارکان نے بھی وزارت کا حلف لیا جن میں شیوسینا کے ایکناتھ شندے اور سباش دیسائی، این سی پی کے جینت پاٹل اور چگن بھجبل اور کانگریس کے بالاصاحب تھوراٹ اور نتین راوت شامل ہیں۔
حلف برداری کی تقریب کے فوری بعد شیواجی پارک ہی نہیں بلکہ شہربھرمیں جگہ جگہ جشن کاسماں نظرآیا ، آتش بازی کی گئی اور ڈھول تاشے کے ساتھ شیوسینک جھوم اٹھے ادھوٹھاکرے نے مراٹھی میں حلف لیا جس میں شیواجی مہاراج اور اپنے والدین کو خراج عقدیت پیش کرتے ہوئے، ایشور کے نام پر حلف اٹھایا۔
تقریباً 20 سال بعد شیوسینا کو پھر ایک بار وزیر اعلیٰ کا عہدہ ملا ہے ادھو، منوہر جوشی، نارائن رانے کے بعد سینا کے تیسرے وزیر اعلیٰ بن گئے ہیں۔ حالانکہ گزشتہ پانچ سالوں تک شیوسینا اقتدار میں رہی، لیکن اقتدار کی باگ ڈوربی جے پی کے دیویندر فڑنویس کے ہاتھوں میں تھی۔
آج کی حلف نامہ کی تقریب میں دیگر ریاستوں کے تین وزراء اعلیٰ سمیت مہاراشٹرا کے سابق وزراء اعلیٰ شرد پوار، سشیل کمار شندے، منوہر جوشی، پرتھوی راج چوہان، اشوک چوہان اور دیندر فڑنویس موجود تھے۔ ان کے علاوہ دیگر کئی سیاسی شخصیات بھی موجود تھیں۔