جے پور،30؍جون (ایس او نیوز؍ایجنسی) ادے پور قتل کے واقعہ پر راجستھان کے وزیر اعلیٰ اشوک گہلوت نے امن برقرار رکھنے کی اپیل کی ہے۔ انہوں نے ٹوئٹ کر کے کہا کہ ’’میں ریاست کے باشندگان کو یقین دلانا چاہتا ہوں کہ مجرم کسی بھی مذہب یا طبقہ سے تعلق رکھتا ہو، اسے بخشا نہیں جائے گا۔‘‘

اشوک گہلوت نے اس سے پہلے کہا تھا کہ ادے پور کا واقعہ کوئی معمولی واردات نہیں ہے۔ جب تک بین الاقوامی یا قومی سطح پر ملزمان کے کچھ تعلقات نہ ہوں ایسا نہیں ہو سکتا۔ اس کی تحقیقات اس امر کو ذہن میں رکھتے ہوئے کی جا رہی ہے، کہ جن لوگوں نے قتل کیا ہے کیا وہ کسی سازش کا حصہ تھے۔

ادھر، کانگریس لیڈر سچن پائلٹ نے کہا کہ میں اسے دہشت گردانہ حملہ قرار دوں گا۔ راجستھان حکومت نے بھی کہا ہے کہ اس طرح کے واقعات کو دہشت گردانہ حملہ کے زاویہ سے ہی دیکھنا پڑے گا۔ ادے پور واقعہ پر سچن پائلٹ نے مزید کہا کہ ملزمان گرفتار ہو چکے ہیں۔ فاسٹ ٹریک کورٹ کی جانب سے انہیں ایسی سزا ملے جو ملک، دنیا میں مثال بن جائے۔ ہم متاثرہ کنبہ کے لوگوں کی تمام مدد مہیا کرائیں گے۔ واقعہ میں جو بھی ذمہ دار، یا کتنا بڑا کوئی شخص یا افسر ہو اس پر سخت کارروائی عمل میں لائی جائے گی۔