اُڈپی 18 اکتوبر (ایس او نیوز) کاپو سمندر میں ڈوب کردو سیاح ہلاک ہوگئے جن کی شناخت بنگلور کے ہیسر گٹّا کے رہنے والے روپیش (21) اور کارتھیک (22) کی حیثیت سے کی گئی ہے۔
ذرائع سے ملی اطلاع کے مطابق بنگلور نیلمنگلا کے پانچ نوجوان سیر وتفریح کی غرض سے آج اتوار کو اُڈپی کے کاپو سمندر پہنچے تھے، یہ لوگ پہلے دھرمستھلا گئے تھے جہاں پوجا پاٹ کے بعد شام کو کاپو پہنچے تھے۔ بتایا گیا ہے کہ مقامی ماہی گیروں سمیت لائف گارڈس کے اہلکاروں نے ان کو سمندر میں نہ جانے کی صلاح دی تھی اور کہا تھا کہ سمندری موجیں بہت تیز ہیں، لیکن ان کی باتوں کی پرواہ نہ کرتے ہوئے پانچوں سمندر میں تیرنے کی غرض سے اُتر گئے۔ ذرائع کے مطابق اونچی اُٹھتی لہروں کی زد میں آکر پانچوں لوگ بری طرح پھنس گئے اور ڈوبنے لگے تو لائف گارڈس کے اہلکار فوری ان کی مدد کو پہنچ گئے، اہلکاروں نے تین لوگوں دلیپ، لکھیت اور جینت کو بچالیا۔
کارتھیک کو بھی لائف گارڈس کے اہلکاروں نے کسی طرح سمندر سے باہر نکالتے ہوئے کنارے تک لے آئے، مگر اسپتال پہنچانے سے پہلے ہی اس نے دم توڑ دیا۔ مگر روپیش سمندر میں غرق ہوکر کچھ دیر کےلئے لاپتہ ہوگیا تھا مگر بعد میں لائف گارڈس کے اہلکاروں نے کافی کوششوں کے بعد اس کی نعش سمندر سے برآمد کرلی۔
کاپو پولس تھانہ میں معاملہ درج کیا گیا ہے۔