کاروار،29/اگست (ایس او نیوز) کاروار کے راستے گوا کی سرحد میں داخل ہونے والے کنڑیگاس سے کووڈ جانچ کے نام پر گوا حکومت کی طرف سے 2ہزار روپے چارج لیے جانے کے خلاف کنڑیگا تنظیموں نے ماجالی چیک پوسٹ کے سامنے احتجاجی مظاہرا کیا۔

موصولہ رپورٹ کے مطابق واٹال پکشا، کنڑا رکشنا ویدیکے ٹیکسی یونین اور دیگر تنظیموں کے اشتراک سے نیشنل ہائی وے 66پر ٹریفک کی آمد ورفت میں خلل پڑااورسرحدی علاقے میں تھوڑی دیر کے لئے حالات کشیدہ ہوگئے۔

مظاہرین نے گوا حکومت کی پالیسی کی مذمت کرتے ہوئے کہاکووڈ لاک ڈاؤن کے تحت جو پابندیاں بین الریاستی سفر پر لگائی گئی تھیں اسے ہٹادیا گیا ہے، لیکن گوا کی حکومت لوگوں سے بلاوجہ 2ہزار روپے وصول کررہی ہے۔انہوں نے مطالبہ کیا کہ فوری طور پر گوا میں آنے جانے والوں کوبغیر کسی رکاوٹ کے  آزادنہ سفر کرنے کی اجازت ملنی چاہیے۔

مظاہرین نے تنبیہ دیتے ہوئے کہا کہ اگر ان کا مطالبہ پورا نہیں ہوتا ہے تو پھر 5ستمبر کو دوبارہ بڑے پیمانے پر احتجاج کیا جائے گا۔ اس کے علاوہ گوا کے راستے سے کرناٹکا میں داخل ہونے والی موٹر گاڑیوں روک کر واپس گوا کی طرف بھیجا جائے گا۔مظاہرین نے کان کون گوا کے ڈپٹی کلکٹر راجیش پربھو کو میمورنڈم دیا۔