برہماور : ندی میں ڈوب کر دو طالب علم ہلاک
برہماور،20؍ اکتوبر (ایس او نیوز) چنتارو گاوں میں شریاس (18 سال) اور انس نامی دو طالب علم ندی میں ڈوب کر ہلاک ہونے کا معاملہ پیش آیا۔
بتایا جاتا ہے کہ کل دوپہر کے وقت کھیلنے کے لئے نکلا ہوا شریاس جب شام تک واپس نہیں لوٹا تو اس کے والد اودئے نے اسے تلاش کرنا شروع کیا ۔ اس تعلق سے جب شریاس کے دوست سنجے راج کے گھر جا کر اس سے دریافت کیا تو اس نے لاعلمی کا اظہار کیا ۔ جب شریاس کی تلاش جاری تھی تو رات کے وقت ایک شخص نے بتایا کہ مڈیسالو ندی کے پاس واقع ریلوے پل کے کھمبے کے پاس ایک بیگ ، چپلوں کی دو جوڑیاں، پانی کی ایک بوتل اور موبائل فون پڑا تھا جو بج رہا تھا ۔ اودئے فوراً اس مقام پر پہنچ گیا اور پہچان لیا کہ موبائل فون اور کپڑے شریاس کے ہیں ۔ اسے یہ بھی پتہ چلا کہ شریاس کے ساتھ سنجے راج اور ایک دوسرے لڑکے کو دیکھا گیا تھا ۔
جب اودئے نے سنجے راج سے تفصیل کے ساتھ پوچھ تاچھ کی اور اس نے بتایا کہ دوپہر دو بجے کے وقت وہ تینوں دوست ندی میں تیرنے کے لئے اترے تھے ۔ اس دوران شریاس اور انس تھوڑے گہرے پانی میں چلے گئے سنجے راج نے انہیں بچانے کی پوری کوشش کی مگر وہ کامیاب نہیں ہوا اور وہ دونوں غرقاب ہوگئے ۔ خوف کے مارے اس نے یہ بات کسی کو نہیں بتائی ۔
پولیس اور فائر بریگیڈ والوں نے آج ندی میں تلاشی مہم چلائی اور دونوں نوجوانوں کی لاشیں برآمد کرلی گئیں ۔ برہماور پولیس نے کیس درج کرلیا ۔ مزید تحقیقات جاری ہے۔