بنگلور میں ائیرو انڈیا شو شروع ہونے سے قبل پریکٹس سیشن میں دو ائرکرافٹ کی فضا میں ٹکر؛ ایک پائلٹ ہلاک، دو کو بچالیا گیا
بنگلور 19/فروری (ایس او نیوز) یلہنکا ائیربیس کے قریب پریکٹس سیشن میں دو ہوائی جہاز کرتب دکھلانے کے دوران اچانک فضا میں ہی ٹکراجانے سے دونوں جہاز آگ کی لپیٹ میں آکر گرپڑے، جس کے نتیجے میں ایک پائلٹ ہلاک ہوگیا، مگر دیگر دو پائلٹوں کو بچالیا گیا ہے۔
میڈیا رپورٹوں کے مطابق دو ہوائی جہازوں پر جملہ تین پائلٹ سوار تھے، دو کو زخمی حالت میں اسپتال لے جایا گیا ہے۔ حادثہ آج منگل 19 فروری کو پیش آیا۔ مرنے والے پائلٹ کی شناخت ساحل گاندھی کی حیثیت سے کی گئی ہے جبکہ دیگر دو پائلٹ وجئے شیلکے اور تیجشور سنگھ کو کمانڈ اسپتال میں داخل کیا گیا ہے۔ بتایا گیا ہے کہ حادثے میں ایک شخص کو بھی چوٹ لگی ہے۔
سوشیل میڈیا میں وائرل وڈیو میں دیکھا گیا ہے کہ جہاز ہوا میں ہی قلابازیاں کھاتے ہوئے گررہا ہے، جس کے بعد آگ کے شعلے بھی بلند ہوتے ہیں۔ حادثے کےفوری بعد ہیلی کاپٹر کی مدد لی گئی۔ جہازوں کا ملبہ اسرو لائیوٹ کے قریب پڑا ہوا پایا گیا، اور فوری طور پر تینوں پائلٹوں کو جہازوں سے نکال کر اسپتال پہنچایا گیا۔ رپورٹوں کے مطابق ایک پائلٹ زخموں کی تاب نہ لاکر چل بسا، البتہ دیگر دو پائلٹوں کو چوٹیں آئی ہیں مگر اُنہیں بچالیا گیا ہے۔
خیال رہے کہ کل بدھ کو بنگلور میں ائرو انڈیا شو منعقد کیا گیا ہے ۔
