مینگلور 4/مئی (ایس او نیوز) ضلع دکشن کنڑا کے بیلتنگڈی تعلقہ کے اُجیرے میں آج ہوئے ایک عجیب و غریب حادثے میں دو نوجوان اُس وقت ہلاک ہوگئے جب اُن کی چلتی کار پر اچانک ایک گھنا درخت جڑ سے اُکھڑ کر گرگیا۔ عینی شاہدین کے مطابق جس وقت یہ حادثہ ہوا، اُس وقت نہ ہوا چل رہی تھی اور نہ ہی بارش ہورہی تھی، اچانک درخت کے گرنے سے مقامی لوگوں میں تشویش پائی جارہی ہے۔
ذرائع سے ملی اطلاع کے مطابق چار دوست ایک ہونڈا ورنا کار پر سوار دھرمستھلا سے واپس اپنے گاوں جارہے تھے کہ اُجیرے نیشنل ہائی وے پر سڑک کے کنارے واقع ایک درخت جڑ سے اُکھڑ کر سیدھے ان کی کار پر جاگرا۔ مرنے والوں کی شناخت بیلتنگڈی تعلقہ کے بالترتیب اُجیرے اور مدن تیہار دیہات کے رہنے والے ویگنیش مُوکند (21) اور کشی تیج جگدیش جین (22) کی حیثیت سے کی گئی ہے۔بتایا گیا ہے کہ یہ دونوں کار کی پچھلی سیٹ پر سوار تھے۔ ویگنیش کی موقع پر ہی موت واقع ہوگئی، البتہ کشی تیج نے اسپتال منتقل کرنے کے دوران ایمبولنس میں ہی دم توڑ دیا۔
کار کی اگلی سیٹ پر سوار دیگر دو نوجوان اس حادثے میں شدید زخمی ہوئے ہیں ، بتایا گیا ہے کہ جیسے ہی درخت گرا، کار پر موجود ائیربیگ کھل گئے اور اگلی سیٹ پر سوار دونوں نوجوانوں کو ڈھانپ لیا، مگراس کے باوجود اُنہیں بھی شدید چوٹیں آئی ہیں اور انہیں قریبی اسپتال میں داخل کیا گیا ہے۔ زخمیوں کی شناخت سوشانت اور ہرشیت کی حیثیت سے کی گئی ہے۔حادثے میں کار کو شدید نقصان پہنچا ہے۔
مہلوک کشی تیج کے تعلق سے بتایا گیا ہے کہ وہ ایس ڈی ایم کالج میں ڈپلوما کا طالب العلم تھا، جبکہ ویگنیش آئی ٹی آئی سے فارغ ہونے کےبعد اُجیرے میں ایک موبائل دکان میں ملازمت کرتا تھا۔
ذرائع نے بتایا کہ جس جگہ یہ حادثہ ہوا، اُس کے اطراف ایسے کئی گھنے درخت موجود ہیں، چلتی کار پر اچانک درخت کے گرنے سے اب مقامی لوگ خطرہ محسوس کررہے ہیں کہ آئندہ بھی اس طرح کے حادثات رونما ہوسکتے ہیں۔
دونوں نعشوں کو بیلتنگڈی سرکاری اسپتال میں پوسٹ مارٹم کے لئے جب لے جایا گیا تو اسپتال کے باہر سینکڑوں لوگ جمع ہوگئے۔ اُدھر سڑک کے درمیان درخت گرنے سے نیشنل ہائی وے قریب ایک گھنٹے تک بند رہا جس کی بنا پر سڑک کے دونوں طرف سواریوں کی لمبی لائن لگ گئی۔ مقامی لوگوں نے ہی درخت کو کاٹ کر ہائی وے کو سواریوں کے لئے کھول دیا۔
بیلتنگڈی ٹریفک پولس تھانہ میں معاملہ درج کیا گیا ہے۔