بھٹکل میں کرونا پوزیٹیو کے دو مزید معاملات ؛ تعداد بڑھ کر ہوگئی تین، بھٹکل میں مکمل لاک ڈاون؛ عوام کو گھروں سے باہر نکلنے پر مکمل پابندی
بھٹکل 24 مارچ (ایس او نیوز) بھٹکل میں کرونا پوزیٹیو کے دو مزید معاملات سامنے آنے کے بعد بھٹکل اور ضلع اُترکنڑا میں کرونا پوزیٹیو کے مریضوں کی تعداد بڑھ کر تین ہوگئی ہے۔
بھٹکل میں کرونا کے دو تازہ معاملات سامنے آنے کی بات سامنے آنے کے بعد بھٹکل میں لاک ڈاون میں سختی برتی جارہی ہے اور انتظامیہ کی طرف سے لوگوں کو باہر آنے پر مکمل پابندی عائد کررہی ہے۔ شمس الدین سرکل، نوائط کالونی اور جالی روڈ سمیت مختلف علاقوں پر لوگوں کو گذرنے کے دوران پولس کی طرف سے لاٹھی سے بھگانے کی خبریں بھی آرہی ہیں۔
جو دو نئے معاملات سامنے آئے ہیں ، اُن کے تعلق سے اُترکنڑا ڈپٹی کمشنر ڈاکٹر ہریش کمار نے بتایا کہ دونوں دبئی سے مینگلور ائرپورٹ اُترے تھے، وہاں سے وہ بذریعہ ٹرین بھٹکل پہنچے تھے۔ انہوں نے کاروار میں پریس کانفرنس سے خطاب کرتے ہوئے یہ بھی بتایا کہ دونوں بالترتیب 20 اور 21 کو خود بھٹکل سرکاری اسپتال پہنچ کر اپنی جانچ کرائی تھی۔ دونوں کا تھروٹ جانچ کے لئے روانہ کیا گیا تھا جس میں دونوں کے رپورٹ پوزیٹیو آئے ہیں۔ جن کے رپورٹ پوزیٹیو آئے ہیں اُن میں کی ایک عمر 65 سال اور دوسرے کی 40 سال ہے۔
مزید تفصیلات کے لئے اگلی رپورٹ کا انتظار کریں