کنداپور 30/نومبر (ایس او نیوز) گنگولی پولس تھانہ حدود کے مولی کٹّے نیشنل ہائی وے 66 پر بائک اور ٹمپو کی ٹکر میں بائک پر سوار دونوں افراد جاں بحق ہوگئے جن کی شناخت گنگولی جامع محلہ کے رہنے والے محمد شاداب ابن محمود حسن (45) اور عبدالرحیم (51) کی حیثیت سے کی گئی ہے۔
بتایا جارہا ہے کہ بائک غالباً گنگولی سے کنداپور کی طرف جانے کے لئے ہائی وے پر ٹرن لے رہی تھی کہ پیچھے سے تیز رفتار ٹمپو نے ٹکر ماردی۔ ٹکر لگتے ہی بائک پر سوار دونوں افراد شدید زخمی ہوکر روڈ پر گرگئے، دونوں کو فوری طور پر کنداپور کے چنمائی اسپتال لے جایا گیا، مگر اسپتال پہنچنے تک دونوں موت کی آغوش تک پہنچ گئے۔ انا للہ و انا الیہ راجعون۔
عبدالرحیم کے تعلق سے بتایا گیا ہے کہ وہ بیندور کے رہائشی ہیں مگر کافی عرصہ سے گنگولی میں کرائے کے مکان پر مقیم تھے۔
دونوں لاشوں کو پوسٹ مارٹم کے لئے کنداپور سرکاری اسپتال منتقل کیا گیا ہے۔
گنگولی پولس میں معاملہ درج کیا گیا ہے، پولس مزید چھان بین کررہی ہے۔