منگلورو:سوشیل میڈیا پر وزیر اعظم اور وزیر داخلہ کے خلاف قابل اعتراض مسیج پوسٹ کرنے والے دو افراد گرفتار
منگلورو،15/اپریل (ایس او نیوز) کورونا وباء کے پس منظر میں وزیر اعظم نریندرا مودی، وزیرداخلہ امت شاہ اور دیگر سیاسی لیڈران کے خلاف فیس بک پر قابل اعتراض مواد شائع کرنے کے الزام میں پولیس نے محمد الیاس اور عبدالبشیر نامی دو لوگوں کوگرفتار کرلیا ہے۔
پولیس ذرائع کے مطابق یہ دونوں وزیر اعظم اور وزیر داخلہ جیسے اعلیٰ مقام پر فائز حکومت ہند کی شخصیات کے خلاف غلط بیانی، زہر افشانی اور اشتعال انگیزی پر مشتمل مواد سوشیل میڈیا پرپھیلارہے تھے۔پولیس کا کہنا ہے کہ ابتدائی تفتیش کے دوران ان دونوں نے اپنا تعلق پی ایف آئی اور ایس ڈی پی آئی سے ہونے کا اعتراف کرلیا ہے اور اپنے ایک وسیع نیٹ ورک کے بارے میں انہوں نے پولیس کو معلومات فراہم کی ہیں جو پس منظر میں رہ کر حکومت کے خلاف ایسا اینٹی پروپگنڈا چلارہا ہے۔سائبر پولیس کی ایک ٹیم تمام لوگوں کے تعلق سے معلومات جمع کررہی ہے جس میں سرحدوں سے باہر بیٹھے ہوئے لوگ بھی شامل ہیں۔ وہ لوگ جہاں کہیں بھی ہوں ان کے خلاف کڑی قانونی کارروائی کی جائے گی۔
پولیس کے پریس نوٹ میں کہا گیا ہے:”جو کوئی بھی کووِڈ19مخالف مہم کو نقصان پہنچانے کی کوشش کرے گا، اس کے خلاف سخت ترین کارروائی کی جائے گی اور کسی کو بھی بخشا نہیں جائے گا۔جن دو ملزموں کو گرفتار کیا گیا ہے ان پر ایپی ڈیمک ڈیسیز ایکٹ 1879کی مختلف دفعات، انفارمیشن ٹیکنالوجی ایکٹ کی دفعہ 67، ڈِسیاسٹر منیجمنٹ ایکٹ 2005کی دفعہ 54اور آئی پی سی کی دفعہ 188،153اور505کے تحت مقدمہ دائر کیا گیا ہے۔“