ہلیال بلاک ایجوکیشن آفسر کی کار جنگلی ہرن سے ٹکراگئی؛ 2 ہرن ہلاک
بھٹکل 4/اکتوبر(ایس او نیوز) ضلع شمالی کینرا کے ڈانڈیلی ریلوے گیٹ کے قریب امبے واڈی میں ہلیال کے بلاک ایجوکیشن آفسر کی کار سے ٹکرا کر 2ہرن ہلاک ہوگئی، واردات جمعہ کی شام کو پیش آئی۔ بتایا گیا ہے کہ ایک ہرن کی موت کار سے ٹکرانے سے ہوئی ، جبکہ دوسری ہرن کی موت دل کا دورہ پڑنے سے ہوئی۔
ذرائع سے ملی اطلاع کے مطابق بلاک ایجوکیشن آفسر سمیر مُلا ایک کرائے کی کار پر ڈانڈیلی سے ہلیال جارہے تھے کہ کتوں کے حملے سے جان بچاتے ہوئے دو ہرن جنگل سے بھاگتے ہوئے روڈ پر آگئیں، مگر کتوں کے حملوں سے جان بچانے کے چکر میں کار سےٹکرا کر ہلاک ہوگئیں۔
محکمہ جنگلات کے آفسر اشوک نے بتایا کہ ایک ہرن کی موت کار کی ٹکر سے ہوئی ہے، جبکہ اپنی ساتھی ہرن کی موت کا منظر دیکھتے ہی دوسری ہرن کو دل کا دورہ پڑگیا اور اُس نے بھی موقع پر ہی دم توڑ دیا۔
حادثے کے فوری بعد کار ڈرائیور سنجیو کمار کو محکمہ جنگلات کے افسران نے اپنی تحویل میں لے لیا اور ڈانڈیلی پولس تھانہ میں اس تعلق سے کیس درج کرلیا۔
دونوں ہرن کو پوسٹ مارٹم کے لئے بھیجا گیا ہے۔ پولس مزید چھان بین کررہی ہے۔
