کرناٹک میں کورونا کے 22 نئے معاملے ، تعداد بڑھ کر ہوگئی 981
بنگلورو،14؍ مئی (ایس او نیوز) کرناٹک میں کورونا وائرس کے متاثرین کی تعداد میں اضافہ رکنے کا نام نہیں لے رہا ہے۔ کل بدھ کو 34 کی رپورٹ کورونا پوزیٹو آئی تھی آج صبح بارہ بجے تک مزید 22 کورونا پوزیٹو کے معاملے سامنے آئے ہیں جس کے ساتھ ہی ریاست میں کورونا متاثرین کی تعداد 1000 سے قریب ہوگئی ہے۔ تازہ بلٹین کے مطابق صبح 12 بجے تک 981 افراد کورونا سے متاثر ہوئے ہیں۔کل بدھ کو ریاست میں کورونا سے 2 لوگوں کی اموات بھی ہوئی ہیں۔جبکہ آج جمعرات کو بھی دو لوگ فوت ہوئے ہیں جس سے مہلوکین کی تعداد بڑھ کر 35 تک پہنچ گئی ہے۔
چہارشنبہ کے روز بیدر میں 12، کلبرگی میں 8، ہاسن میں 4، بنگلورو اربن میں 2، دکشن کنڑا میں 2، داونگیرے میں 2، اترکنڑا میں 2 کورونا پازیٹیو کے نئے معاملات سامنے آئے تھے ۔ جبکہ بیلاری میں ایک کی موت واقع ہوئی تھی۔
ہاسن ضلع جسے گرین زون میں شامل کیا گیا تھا وہاں پہلے روز 5 اور دوسرے روز 4 معاملات سامنے آئے ہیں۔ آج جمعرات کو ریاست میں جن دو لوگوں کی موت کی خبر موصول ہوئی ہے، اُس میں ایک 80 سالہ خاتون مینگلور کے وینلاک اسپتال میں انتقال کرگئی جبکہ دوسری موت بنگلور (اربن) میں اسپتال میں واقع ہوئی ہے۔بنگلور سے ملی اطلاع کے مطابق ایک 60 سالہ شخص انتقال کرگیا ہے جس کا تعلق آندھراپردیش کے آننت پور سے بتایا گیا ہے۔
آج جمعرات کو سرکار کی جانب سے جاری بلٹین کے مطابق بنگلور (اربن) سے5 لوگوں کی رپورٹ کورونا پوزیٹو آئی ہے، گدگ، منڈیا اور بیدر سے چار چار ، داونگیرے سے تین اور بیلگاوی و باگلکوٹ سے بھی کورونا پوزیٹو کے ایک ایک معاملے سامنے آئے ہیں۔
خیال رہے کہ ایک طرف کورونا پوزیٹو کے معاملوں میں اضافہ ہورہا ہے، وہیں 456 لوگ صحت یاب ہوکر اسپتالوں سے رخصت بھی ہوئے ہیں جبکہ باقی متاثرین کا مختلف اضلاع کے اسپتالوں میں علاج جاری ہے۔
اس دوران جن علاقوں میں کورونا وائرس کے متاثرین کی تعداد تیزی سے بڑھتی جارہی ہے وہاں مقامی بلدی اداروں کی طرف سے عوام کی طبی جانچ کا کام آشا کارکنوں کے ذریعہ جاری ہے جبکہ بنگلورو کے پادرائن پورہ علاقے میں جہاں روزانہ ایک دو معاملات مسلسل سامنے آرہے ہیں بروہت بنگلورو مہانگر پالیکے نے اس علاقے میں آباد تمام شہریوں کا کووڈ ٹیسٹ کروانے کا فیصلہ لیا ہے۔ ہیلتھ ورکرس اور میڈیکل عملہ کی طرف سے اس علاقہ میں کووڈ ٹیسٹ شروع کرنے کی تیاری جاری ہے۔
بی بی ایم پی کمشنر انیل کمار کی نگرانی میں اس علاقے میں دو ٹیسٹ شروع کرنے کیلئے انتظامات جاری ہیں۔ امکان ہے کہ جمعرات سے پادرائن پورہ کے 40 ہزار سے زائد شہریوں کا کوویڈ ٹیسٹ کرنے کیلئے بی بی ایم پی اور محکمہ صحت کی ٹیمیں میدان میں اتریں گی۔
اس دوران بتایا جاتا ہے کہ ہیلتھ ورکرس کی طرف سے لوگوں کے ٹیسٹ کا سلسلہ شروع کیا جا چکا ہے۔ بڑے پیمانہ پر ٹیسٹ لئے جانے کے بعد یہ بات صاف ہوجائے گی کہ اس علاقہ میں کورونا وائرس سے کتنے لوگ متاثر ہیں ان تمام کو کوارنٹائن کرنے یا اسپتال منتقل کرنے کے بعد علاقہ کے سیل ڈاؤن میں نرمی لانے میں حکام کو مدد مل سکے گی ۔ مقامی لوگ بھی چاہتے ہیں کہ بیک وقت تمام کی جانچ ہوجائے جو متاثرین ہیں انہیں علاج کیلئے بھیجا جائے ، باقی تمام کو مسلسل ایک ماہ طویل سیل ڈاؤن کی مصیبت سے چھٹکا رہ مل جائے گا۔