یلاپور میں گڈھے میں گر کر دو اسکولی بچیاں جاں بحق
یلاپور15/جولائی (ایس او نیوز)یلاپور تعلقہ کے بلگار نامی مقام پربرساتی پانی کے تحفظ کے لئے بنائے گڈھے میں گرنے سے دو اسکولی بچیاں ہلاک ہونے کی اطلاع ملی ہے۔واردات سنیچر کو پیش آئی۔
اطلاع کے مطابق مہلوک بچیوں کی شناخت دوسری جماعت میں پڑھنے والی رشمی شیو رام پٹگار اورچوتھی جماعت کی طالبہ سہنا بھاگوت بھٹ کی حیثیت سے کی گئی ہے ۔ یہ دونوں لڑکیاں اسکول میں دوپہر کا کھاناکھانے کے بعد قریب میں واقع ایک گھاس کی پہاڑی پر چلی گئی تھیں۔ جب شام تک بچیاں واپس نہیں لوٹیں تو بچیوں کے رشتے دار اور گاؤں والوں نے تلاشی مہم شروع کی۔ کچھ دیر بعد دونوں بچیوں کی لاشیں پہاڑی کے قریب پانی کے تحفظ کے لئے بنائے گئے گڈھے میں پائی گئیں۔
بچیوں کے بارے میں معلوم ہوا ہے کہ دونوں الگ الگ جماعتوں میں زیر تعلیم ہونے کے باوجود آپس میں گہری دوست تھی اور دونوں اسکول کی ذہین طالبات میں شمار ہوتی تھیں۔رشمی پٹگار کا خاندان کمٹہ کے ہیرے گُتی سے یلاپور میں منتقل ہواتھا اور اس کی ماں اوما پٹگار دیہلّی گرام پنچایت کی صدر بھی ہے۔
پوسٹ مارٹم کے بعد دونوں کی نعشیں گھروالوں کے حوالے کی گئی۔ یلاپور پولس اس تعلق سے مزید چھان بین کررہی ہے۔
