اڈپی، 20؍ اکتوبر (ایس او نیوز) سعودی عرب میں مقیم ہریش بنگیرا نامی ایک شخص کا فیس بک اکاؤنٹ ہیاک کرکے اس کے پیج پر مکہ اور کعبۃ اللہ کے تعلق سے ہتک آمیز مواد پوسٹ کرتے ہوئے سعودی پولیس کے ہاتھوں ہریش بنگیرا کی گرفتاری کا سبب بننے والے 2 بھائیوں کو اڈپی  پولیس نے گرفتار کیا ہے اور ان کے خلاف عدالت میں چارج شیٹ داخل کی ہے۔

یاد رہے کہ  ایئر کنڈیشنر میکانک ہریش بنگیرا (33سال)کنداپور کا رہنے والا ہے اور اس کو فیس بک پردین اسلام اور سعودی شاہی خاندان کی ہتک کے الزام میں  سعودی پولیس نے  دما م میں دسمبر کے مہینے میں گرفتار کیا تھااو ر اس کے مالک نے بھی اس کو ملازمت سے برطرف کردیا تھا۔ فی الحال بنگیرا سعودی جیل میں ہی ہے۔ 

بنگیرا کی بیوی نے اڈپی ضلع پولیس کے پاس شکایت درج کروائی تھی کہ کچھ لوگوں نے اس کے شوہر کا اکاؤنٹ ہیا ک کرکے اس کو پھنسایا  اور اس ہتک آمیز پوسٹ سے اس کے شوہر کا کوئی لینا دینا نہیں ہے۔ اڈپی پولیس   سپرنٹنڈنٹ این وشنو وردھن کے بیان کے مطابق اس نے تحقیقات کے بعد یہ پتہ لگالیا کہ موڈبیدری کے رہنے والے  عبدالاویس اور عبدالتویس نامی دوبھائیوں نے بنگیرا کا اکاونٹ ہیاک کیا تھا اور وہ متنازعہ مواد پوسٹ کیا تھا۔ اس  لیے ان دونوں کو گرفتار کرتے ہوئے چارج شیٹ داخل کی گئی ہے۔ اس کے علاوہ وزارت خارجہ کو اس ضمن میں رپورٹ بھیج دی گئی ہے۔