ٹمکور:12؍فروری(ایس اؤ نیوز)ضلع کے گُبِّی تعلقہ کے امانی کیری تالاب میں تیرنے گئے ہائی اسکول کے تین طلبا غرقآب ہوکر ہلاک ہونے کا واقعہ پیش آیا ہے۔ تینوں کی نعشیں تالاب سے برآمد کرلی گئی ہیں۔ جن کی شناخت شری نواس، درشن اور نند ن کی حیثیت سے کی گئی ہے۔ مہلوک طلبا کے متعلق بتایاگیا ہے کہ شری نواس 9ویں جماعت کا طالب علم تھا تو دیگر دو 8ویں جماعت میں زیر تعلیم تھے۔ یہ تینوں وہ محکمہ سماجی فلاح و بہبودی کے ہاسٹل میں مقیم تھے
بتایا گیا ہے کہ صبح کا ناشتہ کرنے کے بعد تینوں طلبا ایک کلومیٹر دور واقع اسکول کے لئے پیدل گئے تھے، لیکن اسکول میں حاضر نہیں ہوئے، ذرائع کے مطابق دوپہر میں مزید دو دوستوں کو لےکر یہ لوگ قریب تین کلومیٹر دور واقع تالاب کی طرف چلے گئے۔ سمجھا جارہا ہے کہ تین طلبا نے تالاب میں تیرنے کے لئے چھلانگ لگائی ، مگر کافی دیر تک پانی سے اوپر نہیں آئے تو کنارے بیٹھے دونوں طلبا نے چیخ پکار کرتےہوئے آس پاس کے لوگوں کو جمع کیا۔ اس کے بعد تالاب میں تلاش شروع ہوئی اور تینوں نعشوں کو باہر نکالا گیا۔ شری نواس بنگلورو کے ماروتی نگر کے مکین اشوتیا کا بیٹا ہے تو نندن گُبی تعلقہ کے کلن ہلی دیہات رہنے والا تھا۔