نیویارک، 20/جون (آئی این ایس انڈیا)اوکلاہاما کی سپریم کورٹ نے صدر ٹرمپ کے خلاف دائر کی جانے والے وہ اپیل مسترد کر دی ہے جس میں استدعا کی گئی تھی کہ صحت عامہ کے خدشات کے پیش نظر صدر ٹرمپ کو ٹلسا میں ریلی نکالنے سے روکا جائے۔صدر ٹرمپ اپنی انتخابی مہم کو دوبارہ شروع کرنے کے لیے ریلی نکالنا چاہتے ہیں۔ کرونا وائرس کے پھیلاؤ کے باعث مارچ میں انتخابی ریلیاں اور جلسے منسوخ کر دیے گئے تھے۔یہ سال امریکہ میں صدارتی انتخابات کا سال ہے۔ نومبر میں ہونے والے انتخابات میں اب بہت کم وقت باقی رہ گیا ہے۔ صدر ٹرمپ اپنی دوسری مدت کے لیے انتخابی اکھاڑے میں اتر رہے ہیں جہاں ان کا مقابلہ ڈیموکریٹ پارٹی کے جو بائیڈن سے ہونے کی توقع ہے۔کرونا وائرس کے بڑے پیمانے پر پھیلاؤ، بے روزگار کی شرح میں تاریخی اضافے اور پولیس کی تحویل میں سیاہ فام امریکیوں کی ہلاکتوں کے واقعات کے بعد پھوٹ پڑنے والے مظاہروں نے صدر ٹرمپ کے لیے ایک مشکل صورت حال پیدا کر دی ہے۔ ری پبلیکن جج، جسٹس ڈسٹن روئے نے اپنے فیصلے میں لکھا ہے کہ عدالت کی یہ ذمہ داری نہیں ہے کہ محض اپنی خواہش کا نتیجہ حاصل کرنے کے لیے قوانین یا ضابطوں کا استعمال کریں۔صحت کے مقامی حکام نے خدشات ظاہر کیے تھے کہ ہجوموں اور جلسہ گاہوں میں کرونا وائرس پھیل سکتا ہے۔صدر ٹرمپ نے جمعے کے روز کہا کہ ٹلسا کے میئر شہر پر نافذ کرفیو کی پابندیاں اٹھانے پر رضامند ہو گئے ہیں، جن کی وجہ سے صدراتی ریلی میں شرکت کے لیے ان کے حامیوں کو مشکل کا سامنا تھا۔انہوں نے اپنی ایک ٹوئٹ میں کہا ہے کہ میں نے ابھی تلسا کے قابل احترام میئر جی ٹی بینوم سے بات کی ہے۔ انہوں نے مجھے بتایا کہ آج رات یا کل ریلی میں شرکت کرنے والے ہمارے حامیوں کے لیے کرفیو نہیں ہو گا۔بہت شکریہ میئر بینوم۔میئر نے اس خدشات کے پیش نظر کہ ریلی میں ایک لاکھ سے زیادہ افراد آ سکتے ہیں اور اس مہینے کے شروع میں شہر اور ملک بھر میں ہونے والے مظاہروں اور بدامنی کے واقعات کے خلاف احتجاج کر سکتے ہیں، کرفیو لگا دیا تھا۔