ہوناور3/جون (ایس او نیوز) ہوناور کے شراوتی سرکل پر کھڑی ایک لاری میں ڈرائیور بے ہوش پائے جانے کےبعد پولس نے اسے مقامی لوگوں کی مدد سے اسپتال پہنچادیا ہے۔ عوام کو شبہ ہے کہ اس پر کورونا وائرس کا حملہ ہوا ہے۔
اطلاع کے مطابق شہر کے شراوتی سرکل پر کھڑی ہوئی تملناڈو کی ایک لاری میں ڈرائیور بے ہوش پڑ ا ہو ا تھا۔ وہاں سے گزرنے والے لوگوں نے جب یہ حالت دیکھی تو کورونا کے خوف سے کوئی اس لاری کے قریب جانے اور ڈرائیور کا حال معلوم کرنے کے لئے تیار نہیں ہوا۔
اطلاع ملنے پر ٹاؤن پولیس اسٹیشن کے ایس آئی ششی کمار موقع پر پہنچ گئے اور ڈرائیور کے بازو والا دروازہ کھول کر دیکھا تو ڈرائیور پوری طرح بے ہوش تھا اور صرف اس کے ہاتھ اور پیروں میں تھوڑی سی حرکت ہورہی تھی۔فوری طور پرایمبولینس منگوائی گئی مگر کورونا کا مریض ہونے کے خوف سے ڈرائیور کو لاری سے نیچے اتار نے کے لئے کوئی تیار نہیں تھا۔ پھر پٹن پنچایت کے صدر سریش ہوناور اور ٹیکسی ڈرائیورشری کانت میستانے پی پی ای کا استعمال کرتے ہوئے ڈرائیور کی کیبن میں داخل ہوکر اسے اتارا اور ایمولینس کے ذیعے تعلقہ اسپتال روانہ کردیا گیا۔اسپتال میں ابتدائی جانچ اور طبی امداد کے بعد ڈرائیور کو کورو نا آئسولیشن وارڈ میں منتقل کرتے ہوئے اس کے گلے کا نمونہ جانچ کے لئے روانہ کردیا گیا۔