اسرائیل کے ساتھ فائر بندی کا معاہدہ طے پا گیا ہے: فلسطین

Source: S.O. News Service | By Shahid Mukhtesar | Published on 6th May 2019, 4:40 PM | عالمی خبریں |

غزہ 6مئی (ایس او نیوز/آئی این ایس انڈیا) فلسطینی حکام نے دعویٰ کیا ہے کہ دو روز سے جاری کارروائیوں کے بعد اسرائیل کے ساتھ فائر بندی کا معاہدہ طے پا گیا ہے۔ تاہم ادارہ اس خبر کی تصدیق نہیں کرسکتا ہے۔ واضح ہو کہ ہفتے کو شروع ہونے والی لڑائی کے بعد خطے میں جنگ کے خطرات منڈلانے لگے تھے۔خبر رساں ادارے اے ایف پی کے مطابق فلسطینی تنظیموں حماس اور اسلامک جہاد کے عہدیداران نے نام ظاہر نہ کرنے کی شرط پر بتایا ہے کہ مصر نے فریقین کے مابین فائر بندی میں کردار ادا کیا۔معاہدے کے تحت اسرائیل پر راکٹ حملے بند کئے جائیں گے جبکہ اسرائیل بھی غزہ میں کوئی فضائی یا زمینی کارروائی نہیں کرے گا۔مصر کے ایک نمائندے کی جانب سے بھی شناخت ظاہر نہ کرنے پر قیام امن کے معاہدے کی تصدیق کی گئی ہے۔اسرائیل اور فلسطین کے مابین ہونے والی حالیہ لڑائی کو 2014کے بعد ہونے والی بڑی کارروائی قرار دیا جا رہا ہے۔خبررساں ادارے’اے ایف پی‘ کے مطابق ہفتے کے روز کشیدگی اس وقت شروع ہوئی جب غزہ کی جانب سے جنوبی اسرائیل پر متعدد راکٹ داغے گئے۔ جس کے بعد اسرائیلی فضائیہ اور زمینی افواج نے غزہ میں بمباری کی۔اطلاعات کے مطابق حالیہ لڑائی میں 9 عسکریت پسندوں سمیت 23 فلسطینی ہلاک ہوئے ہیں۔ جبکہ تین شہریوں سمیت چار اسرائیلی بھی ان واقعات میں ہلاک ہوئے ہیں۔حماس اور اسلامک جہاد کی جانب سے اسرائیل پر الزام عائد کیا گیا تھا کہ وہ مصر اور اقوام متحدہ کی معاونت سے طے پانے والے جنگ بندی کے معاہدے کی خلاف ورزی کر رہا ہے۔تنظیموں کا دعویٰ تھا کہ اسرائیل غزہ کی پٹی کے اطراف رکاوٹیں بڑھا کر آمدورفت محدود کر رہا ہے۔ جو کہ معاہدے کی خلاف ورزی ہے۔اسرائیل کے وزیر اعظم بینجمن نیتن یاہو نے اتوار کو ایک بیان میں کہا تھا کہ انہوں نے افواج کو غزہ کی پٹی میں موجود دہشت گردوں کے ٹھکانوں کو نشانہ بنانے کی اجازت دی ہے۔حماس اور اسلامک جہاد کی جانب سے یہ موقف سامنے آیا تھا کہ مکمل فائر بندی اسی صورت ممکن ہے جب اسرائیل غزہ میں کارروائی کو مکمل طور پر روک دے۔اسرائیل کا دعویٰ تھا کہ حماس اور اسلامک جہاد کی جانب سے جنوبی اسرائیل پر 590 راکٹ داغے گئے تھے جس کے جواب میں اسرائیل نے کارروائی کی۔اسرائیلی حکام کے مطابق دو روز کی کارروائی کے دوران غزہ میں 350 سے زائد ٹھکانوں کو نشانہ بنایا گیا۔فلسطینی وزارت صحت کے مطابق ہفتے کے روز ہونے والی ایک کارروائی میں چودہ ماہ کا بچہ بھی شہید ہوا تھا۔
 

ایک نظر اس پر بھی

کشمیریوں کا ڈرختم ہوچکا میں دنیا میں کشمیرکا سفیر بن کرجاؤں گا اور بتاؤں گا کہ آرایس ایس کی اصلیت کیا ہے؟ مظفر آباد میں عوام سے عمران خان کاخطاب

کشمیر سے دفعہ 370کے خاتمہ کے اعلان کو غلط ثابت کرنے کیلئے پاکستانی وزیر اعظم عمران خان اقوام متحدہ کی سلامتی کونسل سے خاطر خواہ جواب ملنے کے بعد پوری دنیا کے اہم اداروں کے دروازے کھٹکھٹانے پر مجبور ہیں -

کشمیر میں ہندوستان بنیادی انسانی حقوق کی پامالی کررہا ہے:پاکستان

ہندوستان اور پاکستان نے اقوام متحدہ کی حقوق انسانی کونسل (یواین ایچ آر سی) کے جاری سیشن میں آج جموں وکشمیر کے سلسلے میں اپنا اپنا موقف پیش کیا -47 رکن ممالک کے انسانی حقوق کی کونسل کے اہم سیشن کیلئے اعلیٰ سطحی وفد پہلے ہی جنیوا پہنچ چکا ہے - مشاہدین کے مطابق پاکستان نے کشمیر میں ...

عراق کے کربلا میں بھگڈر کے دوران 31 زائرین جاں بحق، سو سے زائد زخمی

عراق کے شہر کربلا میں قائم ایک مزار میں یوم عاشورہ کی مناسبت سے جاری جلوس میں بھگدڑ مچنے کے نتیجے میں 31 زائرین جاں بحق ہوگئے، جبکہ سو سے زائد زخمی ہوگئے ہیں۔ میڈیا رپورٹوں کے مطابق  زخمیوں میں دس کی حالت نازک بتائی گئی ہے، جس کو دیکھتے ہوئے ہلاکتوں کے اضافے کا بھی اندیشہ ہے۔