عام مسافروں کیلئے لوکل ٹرین کی بحالی میں پریشانی
ممبئی،31؍اکتوبر(ایس او نیوز؍ایجنسی) عام مسافروں کیلئے لوکل ٹرین خدمات کی محدود بحالی کی مہاراشٹر سرکار کی تجویز پر مسائل کا حوالہ دیتےہوئے ریلوے انتظامیہ نے گیند ایک بار پھر حکومت کے پالے میں ڈال دی ہے۔
ویسٹرن اور سینٹرل ریلوے نے ریاستی حکومت کو بھیجے گئے جواب میں یہ سوال اٹھایا ہے کہ کورونا کیلئے احتیاطی تدابیر کو ملحوظ رکھتےہوئے بھیڑ پر کس طرح قابو پایا جائےگا۔ ریلوے انتظامیہ نے بھی واضح کیا ہے کہ وہ کورونا کی وجہ سے یومیہ 21؍ لاکھ سے زیادہ مسافروں کیلئے گنجائش نہیں پیدا کرسکتی۔
واضح رہے کہ کورونا کی وبا سےقبل لوکل ٹرینوں میں یومیہ 80؍ لاکھ سے زیادہ افراد سفر کرتے تھے۔ اس کی وجہ یہ بیان کی گئی ہے کہ کورونا کی احتیاطی تدابی کی وجہ سے اب ایک لوکل ٹرین میں صرف 700؍ مسافر ہی سفر کرسکتے ہیں جبکہ مارچ تک ایک ٹرین میں صبح اور شامل بھیڑ کے وقت 5؍ ہزار افراد سفر کرتے تھے۔ ویسٹرن ریلوے نے اپنے جواب میں کہا ہے کہ وہ خدمات کو پوری طرح بحال کرنے کیلئے تیار ہے مگر بھیڑ کے کنٹرول کی تکنیک کا ہونا لازمی ہے۔