انتظامیہ میں سدھار کیلئے ہر مرحلے میں تربیت ضروری:چکمگلورو ڈپٹی کمشنر کے این رمیش
چکمگلورو، 11؍جنوری (ایس او نیوز)انتظامیہ میں سدھار کے ساتھ بہتر فیصلے کرنے کیلئے ضروری تربیت دی جانی چاہئے۔یہ بات ڈپٹی کمشنر کے این رمیش نے کہی۔
انہوں نے یہاں ضلع پنچایت میٹنگ ہال میں محکمہ مالگذاری کے ملازمین کیلئے روینیوکے معاملات کے تعلق سے منعقدہ ورکشاپ کا افتتاح کرنے کے بعد اپنے خطاب میں کہا کہ حکومت ہر مرحلے میں افسرو ں کو تربیت دینے کا ارادہ رکھتی ہے،اسی کے تحت گذشتہ سال ریاستی تربیتی پریشت کا قیام عمل میں لایاگیاہے اورتربیت دی جارہی ہے۔افسروں کیلئے تربیت حاصل کرنے کے سلسلے میں بھی واضح پالیسی تیار کی گئی ہے۔افسروں کیلئے تین مرحلوں میں تربیت دی جائے گی،پہلے مرحلے میں جب ملازمت ملتے ہی دی جاتی ہے،دوسرے مرحلے میں روزانہ کے انتظامیہ کی سرگرمیوں کے تعلق سے اور ذمہ داری کے ساتھ کام انجام دینے کے بارے میں دی جانے والی تربیت دی جاتی ہے اور تیسرے مرحلے میں نگرانی اور فیصلے کرنے کے تعلق سے تربیت دی جاتی ہے،ان تمام مرحلوں میں تربیت حاصل کرنے سے کامیابی کے ساتھ کام انجام دیاجاسکتاہے۔
انہوں نے کہاکہ ہر دفتر میں لازمی طور پر گارڈ فائل مینٹین کرناہوگا،اس فائل میں حکومت کی طرف سے جاری کئے جانے والے سرکیولر اور احکامات کو اکٹھاکرکے رکھناہوگا، اس کے علاوہ آڈٹ رپورٹ بھی ٹھیک طریقے سے رکھنی ہوگی۔حکومت کے کسی بھی ایکٹ پر سختی سے عمل ہوناہو تو اس تعلق سے سب سے قبل افسرو ں کو جانکاری ہونی چاہئے۔اڈیشنل ڈپٹی کمشنر بی آر روپانے کہا کہ محکمہ مالگذار ی میں کام انجام دینے والے افسروں اور عملہ کو چاہئے کہ اس کام کو اپنانصیب سمجھیں،کیونکہ پیدائش اورموت کی سرٹی فیکٹ کے علاوہ انکم،کاسٹ اور پینشن کی دستاویز تک فراہم کرنے کی ذمہ داری اس محکمہ کے افسروں کی ہوتی ہے۔
اس موقع پر ریسورس پرسن کے طورپر وظیفہ یاب تحصیلدار ایم ٹی کولے گوڈا،نٹیش، ویرو پاکشپا، سرینواس،راگھویندرا،سرشتے دار روی کمار،ڈپٹی تحصیلدار سجاتانے حصہ لیا۔